Leitzarango bide berde eta ainubea
Leitzaranen zehar --eta hogeita bederatzi tunelpetan barrena-- bide gorria ez den (bertako basazainen ibilgailuak ibili ohi dira) bide berde hau Biotopo Babestua da eta ezin esan, beraz, paraje ederra ez denik; baina, aukeran, ainube eta laiotz samarra, segurutik aproposagoa udarako negurako baino.
Honako zidor hau 1904 urtean irekitako trenbidearen ondorioa da, Andoaindik Bizkotxeko meategietaraino iristeko egin zen burdinbidearen azken oinordea. Geroztik, mutur bietatik aurrera luzatu eta Donostiatik Iruñerako bidaiari-trentzat ere erabili izan zen, 1953an behin betikoz ahitu arte.
Izatez, Leitzarango bide berde hau Andoaindik Lekunberrira bitartekoa da eta Plazaola, erdibidean baino ez dago. Nafar isurialdea, Leitza herrian barrena, zainduagoa, txukunagoa, politagoa, irekiagoa eta eguteragoa omen da. Hurrengoan.
Plazaola, Gipuzkoa eta Nafarroa arteko mugan. Hogei kilometro luze Andoaineraino eta pare bat gehiago Lekunberriraino.
Zortzi begidun ubide galanta, Ameraunen.