Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Lanari laga

Amatiño

Lanari laga

Amatiño 2010/01/30 00:15
Behar bada albistea berria da baina ez, ordea, egoera. Espainiar gobernuak erretiro-adina atzeratuko omen du. Eta inori ez diot entzun “ay, ze ondo”. Gazkien hartu dutenak berrogeita hamar urteren bueltan daudenak izan dira. Hirurogeitik gorakooi ez digu eragin handirik egingo eta berrogeikoek, nonbait, urruti samar ikusten dute. Dena dela, lanari laga behar horrek ez nau batere asebetetzen. Ez nahiezta, eta are gutxiago nahita.

Llabur-llabur esanda, badirudi arazoa ez dela katramilatsuegia. Alegia: gero eta urte gehiago bizi gara. Hurrengo urteetan jubilatuen kopurua ikaragarri gehituko da eta langileena, ostera, nabarmen gutxitu. Hau da, gero eta gehiago izango gara pentsioa kobratu nahi izango dugunok eta, aldi berean,  gero eta gutxiago gizarte-segurtasuna ordainduko dutenak. Horretara, pentsioak murriztuko ez badira, ordaintzaileek gehiago ordaindu beharko dute urteko ala --beste aukera bat-- urtero orain beste baina urte gehiagotan.

Hala ere, eztabaida honetako urte-kontuen gainetik, ni gehien harritzen nauena jendeak lana uzteko duen presa da. Zertarako ote? Ni bonba atomikoa bezain zaharra naiz, beste hogeitabosten bat urte bizitzeko asmoa daukat eta ez dut ulertzen zenbaiten erretiroa hartzeko irrika. Nere ustez, presarik ez izateko arrazoi nagusiak hiru dira, besteak beste:

  1. Kronologia-arrazoia. Izan ere, aurten jubilatuko banintz,  ez dut sumatzen zer arraio egingo ote nukeen hiruzpalau urte barru jubilatuz gero egin ez nezakeenik. Bizitza luzea da. Zergatik eta zertarako ajenda aurreratu? Utz gero egutegia bere gisara!
  2. Ideologia-arrazoia. Ni beharrean hasi nintzenean (1963) sei laneguneko astea zen eta hamar eguneko oporrak. Gaur egun, aldiz, lau  egun t’erdiko astea dut, hilabeteko oporrak, lantzean behingo zubiak eta, gutxi bailiran, Gabonetan zein Aste Santuan, zubitzarrak. Ondo dago sozialak izatea, ezkertiarrak, ekologiazaleak, modernoak, aurrerakoiak, solidarioak etab. Baina inork ez du gero pentsatuko “eskubidetzat” jotzen ditugun zenbait lan-aldarrikapen kontserbadoreak eta insolidario hutsak ez direnik ezta?
  3. Biologia-arrazoia. Gazteagoek jakin ez arren, hirurogeitik gorako helduen hiztegian berbarik amorragarrienetakoa, ahal dela gutxien erabili beharrekoa, “laga” da: erretzeari laga, edateari laga, afaltzeari laga, irtetzeari laga, kirolari laga, larrua jotzeari laga, gidatzeari laga… etab. Nik ere, 65 urteko edonork bezala, kristoren beldurra diot aipatutako guzti horri laga beharrari. Baina hau guztia egia izanik –eta arras ulergarria, noski--, zer dela eta lanari laga nahi hori?

 

Inork aitortzen ez duen arren, zahartzaroaren adierazgarririk handienetakoa lanari laga beharra da. Izan ere, gizarteak ez gaitu ofizial zahartzen, erretzeari, edateari, afaltzeari, kirolari edo larrua jotzeari lagatzeagatik, lanari lagatzeagatik baino.  Eta, paradoxa bada ere, inork zahartu nahi ez duen  mundu honetan mundu guztiak nahi du lanari laga…

Ba… nik, ez. 

                                      

 

ramon
ramon dio:
2010/01/30 23:14

Beno amatiño adarjotze pizkatxo batez, moztik euk bizarra lepo paretik sendo eta nik jasoko dizkiat hik jubilazioan kobratu beharreko sosak 50 urte bete behar dizkiat eta, ein? sozialismo es libertad

markos zapiain
markos zapiain dio:
2010/01/30 17:59

Egia diozu. Esnatu berritan oraindik erdi lelotuta datozkizun txorakeriak ziur aski, ametsak bezain logika gutxi baitu sarritan ametsaren interpretazioak. Dena den, Freudek aholkatu legez elkarlotura libreak ekartzeari ekin eta Irungo gizon batzuk datozkit gogora, Euskadik independentzia lortu arte ez zutela bizarrik ebakiko ziurtatu eta bereziki Alardean arreta deitzen zutenak, ia asfaltora arteko beren bizar ikaragarri luzeekin. Ametsean ile-luzatze kontuak zebiltzanez gora eta behera, eta abertzaleen artean...

Amatiño
Amatiño dio:
2010/01/30 18:48

Itsas aldean izarra, hari begira lizarra; euskara salbo ikusi arte ez dut kenduko bizarra.

Amatiño
Amatiño dio:
2010/01/31 01:56

Adarjotzeari ez zioat nik muzinik egingo baina ez deuat ezer ulertzen. Eta adarjotzearen oinarria elkar ulertzea duk.

markos zapiain
markos zapiain dio:
2010/01/30 12:21

Amatiño, taberna batean nengoen mahai batera eserita. Tabernan sartu egin zara eta pintxo bat eta kafea eskatu hamaiketakorako. Ametsean ezin igarri jadanik jubilatua zinen ala ez. Ordaintzera zindoazenean mahaitik altxatu, barrara hurbildu eta dirua gorde dezazun keinua egin dizut, aldi berean esaten nizula: “Irunen gaude, eta beraz neuk ordainduko dizut, besterik ez genuen behar”.

Ile indartsua duzu buruan, kaskoa goitik behera estaltzeaz gain gorantz ere abiatzen zaizuna, tupe bitxi bat. Ile-ateratzeko produktu bat aholkatu didazu, “gaur bertan hasi beharko zenuke hau hartzen, eta seriotasunez eutsi”, eta markaren izena paperezko serbilleta batean apuntatu didazu.

Behin esnatuta markaz oroitzen ahalegindu naiz baina dakidan gauza bakarra da lau silaba zituela.

Ez dakit zelan interpretatu. Euskadik laster lortuko duela independentzia, interpretazio posible bat.

(Bide batez, hiztegiek servilleta ahozapi edo ezpainzapi dakarte, baina paperezkoa baldin bada? Ahopaper, ezpainpaper?)

ramon
ramon dio:
2010/01/31 23:52

Ba jubilazio garaia luzatzeko asmoetan ez dagoela hik aipatutako hiru arrazoieteko bakarra ere ez funtsean, ze arrazoia ekonomikoa dok. Orduan dirua nola banatu da benetako eztabaida.

Amatiño
Amatiño dio:
2010/02/01 16:16

Nik ez juat iñundik be esan nik aittatutako hiru errezoiak diranik Gobernuak gogoan dittuanak jubilaziñoa atzeratzeko, neriak baiño nik neuk aurten erretirorik ez hartzeko.

Jakiña Gobernuaren errezoia ekonomikoa dala. Esan be esan najuan arazoa ez dala "katramilatsuegia", ziharo nabarmena dalako, hau da, diru-sarrerak urteerak baino murritzagoak.

Baina nere errezoiak neriak dittuk, ez iñonak. Hiriak kontatu egixaz hik.

Galdera bat besterik ez: hire erantzunak postak irakorri ostian idazten dittuk ala beste barik, bota botatze aldera?

Amatiño
Amatiño dio:
2010/01/30 13:12

Politta. Baina, independentziaren interpretazio horren nondik norakoa ez diat ulertzen...

ramon
ramon dio:
2010/02/08 11:43

Nik nahi juaten gauza bakarra lehen bait lehen jubilatzea da, gehineon modura, badakit gaur (10-2-8) irakasle bat 60 urtekin jubilatzen dena (zorionak berari), ez dotena ulertzen holakoak dira batzuk 67 urterekin jubilatu biharra eta oraindik orain hori onartuz gero 65 urte bete gabe gendea jubilatzea, nik postok idazteko modua neure ahalmenaren araberakoak dittuk, hik hire errezoiak botatzeko orduan inoren "ay, ze ondo"rekin hasi dok, orduan hasi eure iritziok esaten eta besteen pentsamenduak pakean utzi, ze ni neu gai honekin hasaldaturik negok, sosok banatzeko beste idea batzuk bajittuat.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna: