Kultura kalean
Gaiak eta doinuak gizarteratzeko orduan, ez dira inondik ere ezezagunak Bergarako Orkestra Sinfonikoaren ahalmenak eta erakutsi ohi dituen joerak. Nabarmena gero, Alfredo Chirlaque zuzendariaren eragina, eta “belarri bistakoa” haren sena hainbat musikal, zine-banda eta euskal kanta egokitze eta moldatzerakoan: Sorotan bele, Mecano, Benito Lertxundi... “Out of Africa”, “Moulin Rouge”, “Lord of the rings”… Beti ere, zer esanik ez, Bergarako soka-taldeak ohiturik gauzkan bikaintasunaren lepotik.
Aitortu behar dut, ostera, sekula ikusi gabe nituela Osintxuko dantzariak. Joño… surprise, surprise… dantzari ikusgarriak gero, ikustea merezi dutenetakoak alegia. Politto asko, aurrez grabatuta ekarri zituzten soinu-uhinen haritik; eta, aparteko antzezkizun dotorea, berriz, Bergarako musikarien sokatik: gorputza zuten liraina eta, oinak zebiltzaten aidean...
Larunbat eguerdian, San Martin Agirre plazan, ez genuen guk kulturaren aukerarik egin. Kulturak harrapatu gintuen gu. Horixe zen, antza, helburua: mortalak esan beharrik gabe, isilik misilik, ia-ia ezustean, kultura kaleratzea.
Bergarako Orkestra Sinfonikoaren soka-taldea
Osintxuk hiru auzo ditu: MUSkitxu, IRAba eta KAparra. Horra, nondik, “Musiraka” dantza-taldearen izena. 2005ean sortua, Amaia Agirreren eta beste hogeitaka lagunen eraginez.
Etorkizuna emakumeena omen...