Krisialditik ateratzeko errezeta: konfiantza eta elkarlana
Edurne Pasaban, Muskizen
Edurne Pasaban hizlari nagusia izan zen, Muskizen, aurtengo Marcelo Gangoiti sarien emanaldian eta, galderantzunen txandan, Juan Ignacio Motiloa industria-sailburuorde berriak itaundu zion zein ote litzatekeen, haren ustez, egoera latz honen aurrean azaldu beharreko jarrera. Tolosar mendizaleak bi ideia aipatu zituen labur asko: konfiantza eta elkarlana.
Pasabanek adierazi bezala, “ezinbesteko aklimatazio-garaia pasatu da, denok moldatu behar izan dugu krisialdi-girora, kanpamendutik ateratzeko ordua da, eta aukera berriei aurre egiteko unea, konfiantzaz eta elkarlanean”.
Edurne Pasabanen iritziz, sekulako ahalak ditugu, jende ikaragarri ondo prestatua, adorerik eta kemenik ez zaigu falta, baina “behar bada, urritxo elkarlanean, talde-lanean, arlo honetan badugu zer ikasirik”. Adibide gisa, aitortu zuen: “Jakina ni arrakasta dezente lortu duten hainbat mendizale-talderen aurpegia naizena, baina zalantzarik ez gero ni ez nintzela sekula iritsi naizen gailurretara iritsiko, atzean lan-talderik izan ez banu”.
Ezaguna denez, Edurne Pasaban Industria Ingeniari Teknikoa da eta ESADE masterra. Aspaldiotan coaching alorrean dihardu lanean, ikastaroak eta mintegiak ematen; alegia, zelan enpresaren baitan ezarri, edozein zortzi milakotara igotzeko behar diren talde-lana, metodologia, motibazioa eta kemena.
Hala ere, beste bi osagarri gehituko nioke aterabide honi: gardentasuna maila guztietan eta justizia zorrotz eta menpekotasunik gabekoa, zeren, amorragarria izango bailitzateke Herriak jota ke lan egitea alde batetik eta “betikoek”, bestetik, euren ustelkeriei esker, Herriak lortutakoa paradisu fiskaletara eroatea orain arteko zigorgabetasunaz babestuak.
Beharbada, gehiegi eskatzen dut.