Juanjo Pujana, helenista porrokatua
Bilbon jaiotako arratiarra, Deustuko Unibertsitatean zuzenbidean lizentziatua, Juan Ajuriagerraren magalean ekin zion politikan esku hartzeari. EAJren ordezkarietakoa izan zen, Baionako Txiberta hotelean, ETAk armetan jarraitzea erabaki zuen bileran. 1979ko hauteskundeen ondotik, Eusko Legebiltzarraren aurreneko presidente izan zen eta, 1986an, Garaikoetxearekin batera, Eusko Alkartasunaren sorreran parte hartu zuen. Baita alderdi berria utzi ere, 2009an, EAJrekin osatzen zuten koalizioa etetea erabakitzeagatik.
Eskolan ikasia zuen oinarrizko greziera apurrari muzin egin ez ezik, lantzen jarraitu zuen bere kasa. Helenista porrokatua, grezieraz irakurtzen eta idazten ikasi zuen, lehenik, hizketan dezente moldatu gero, eta Platonen “Errepublika” euskaratzeraino heldu.
Giro hartan, “Jakintza Baitha” greziar elkartearen sortzaileetakoa izan zen, Federiko Krutwigekin batera, Alfontso Irigoien, Josu Lavin, Juan Angel Echevarria eta beste tarteko. “Hierax” (Halcón: revista de cultura griega) sortarazi zuten eta, lau urtez (1993-1995) beste hainbeste ale argitaratu.
Euskalerriaren Adiskideen Elkartekoa, Herrien Europaren Institutuaren eragile, Musikene Goi Mailako Ikastegiaren koordinatzaile nagusi, hainbat libururen idazle eta euskal liburutegi pribaturik jantzienetakoaren biltzaile… Juanjo gero eta urriago geratzen ari zaizkigun errenazentista horietako genuen.
Goian bego.
- Juan Jose Pujana, legebiltzarburua; Henrike Knörr, euskaltzaina; Jesus M. Leizaola, lehendakari zaharra eta Rafael Ossa-Echaburu, kazetaria. XV. mendeko Muñatoiz gaztelua, 1984.
