Joseba Agirre, atzerriko seme eredugarri
Jose Antonio Agirre lehendakariaren seme, Joseba atzerrian jaio, hazi eta hezitako belaunaldi miresgarriaren ereduetakoa dugu. Haurtzaroan zein gaztaroan New Yorken, Donibane Lohitzunen eta Parisen bizi ondoren, unibertsitate-ikastaroak Cambridgen egin zituen bekaz, 21 urterekin britainiar herritartasuna hartu zuen eta Franko hil ostean Euskadiratu arte munduan barrena aritu izan zen esportazio-arloan.
Ez dut nik estatistika-datu zehatzik, baina beti uste izan dut Francoren matxinada militarraren ondotik erbesteratu behar izan zuten abertzaleak Euskal Herrian geratu zirenak baina gehiago arduratu izan zirela euren seme-alaben heziketaz, prestakuntza akademikoa eta eleaniztasuna bailiren atzerriko "desherrian" euren ondorengoei utzi liezaieketen jaraunspenik baliotsuenak. Edo, beste modu batez esanda, trebakuntza balitz bezala noizbait Euskal Herrira zutunik itzultzeko giltzarik aukerakoena.
Zer gerta ere, berriketa gabeko belaunaldia gero, premian zein zailtasunean saiatua eta ahalegindua. Sekula ez negarrik, kexarik, eskakizunik edo norberarentzako eskubide-aldarririk. Beti baikor, umorez eta patxadaz, laguntzeko gertu, beti ere iragan hurbila nabarmen latzagoa izan zelakoan... Joseba lekuko.
Jose Antonio Agirre eta Mari Zabala senar-emazteak, Aintzane, Iñaki eta Joseba seme-alabekin, 1950eko hamarkadan