"Matonismoaren" gutunak
Juan Alcorta Maiz (Donostia, 1921-2004) ETAren iraultza-zerga zeritzan jazarpena nozitu zuten 10.000 inguru lagunetako bat izan zen, eta, ordaintzeari uko egiteaz gainera, erabakiaren berri idatziz jakinerazi zuen lehena.
Enpresari honen lekukotasunaz eta beste berrehunen bat elkarrizketaz zein informazio-iturriz, Deusto Etika Aplikatutako Zentroak bildu eta argitaratu du, Izaskun Sáez de la Fuente Aldama Etika irakaslearen zuzendaritzapean, honako ikerlana: Misivas del terror. Análisis ético-político de la extorsión y la violencia de ETA contra el mundo empresarial (Marcial Pons Historia 2017), “un estudio fundado en el rigor académico y la honestidad intelectual”.
Sarrera bat (Izaskun Sáez de la Fuente Aldama) du ikerketak eta lau atal: I. La extorsión como proceso social en un contexto de violencia terrorista (Izaskun Sáez de la Fuente Aldama eta Jesús Prieto Mendoza); II. Partidos políticos y organizaciones empresariales frente a la extorsión de ETA (Izaskun Sáez de la Fuente Aldama); III. Perspectiva ética: las víctimas extorsionadas (Xabier Etxeberria Mauleon eta Galo Bilbao Alberdi); IV Perspectiva ética: victimarios, mediadores y circunstantes (Galo Bilbao Alberdi eta Xabier Etxeberria Mauleon) eta V. Conclusiones generales (Izaskun Sáez de la Fuente Aldama). Baita Bibliografia, Anexos eta Indice Onomástico ere.
Zalantzarik ez gero ikerketa guztiak zer azter, zer hausnar eta zer pentsa ematen duela, baina ikara sortzen dute gero eranskinen artean azaltzen diren ETAren gutunek, ezkutupeko mundu hartan nagusitu zen giroak, eta giro hartan gatzatu ziren hizkerak, jokamoldeak eta sasi-zilegitasunak. Nolabaiteko “matonismo” hutsa.
Kristoren azterlana Deusto Etika Aplikatu Zentroak burutu duena, tamalez zabalkunde urria izango duena eta hurrengo belaunaldietan hainbat adituk baino jakingo ez dutena. Eta ez diot mendekurik aldarrikatzeagatik, iragana ahazten duen gizarteak beste hainbeste errepikatzeko arrisku gorria duelako baizik.
Gutun hau ez da "Misivas del terror" liburutik atera, nire etxeko paper zaharren artetik baino