Ialgi hadi Posta kalera!
Posta kalea, Bilbon
Azpimarragarria, diot, oharkabean-edo ezjakina delako gertakari horiek guztiak Bilboko Posta kalearen inguruan bildu izana; eta, are azpimarragarriagoa, artikulugilea Bilboko bertako alkatea denez gero.
Edozelan ere, Bilboko Posta kalearen historia ez da edozelakoa. Etxepareren garai bertsuan, XV. mendearen amaieran sortua, inguru hartan –Askao auzoan, Teofilo Guiard historialariak dioenez-- kokatu zen Bilboko lehen moldiztegia non, 1596 urtean, argitaratu zen euskarazko lehen doktrina, Joan Perez Betolaza arabarrak itzulia.
Posta kalean bertan, hiru mende geroago, Sabino Aranak ireki zuen aurrenengo Euzkeldun Batzokija, eta inaugurazio hartan zintzilikatu zen, estreinako ere, Posta kalera begira, euskal ikurrina.
Sortu ere Posta kalean sortu zen, 1937ko Urteberri egunean, ‘Eguna’ egunkaria, eta Posta kaletik bertatik aldarrikatu zen, bizkaieraz, orduan batere ezaguna ez zen kontrapasa: “Etxepareren ames berberez kutsatuta gatoz. Eta Eguna biotz, begi eta gogoetan darabilgunok idazle zar aren kanta bero eta gartsuz didar dagigu: Euzkera, jalgi adi kanpora! Euzkera, jalgi adi plazara! Euzkera, abil mundu guztira, Eguna’ren egoetan!”.
Orobat, Posta kalearen atzekaldean dago kokatua Euskaltzaindiaren egoitza nagusia; Posta kalean finkatu zen Verdes liburudenda, “gerra aurreko eta ondoko urteetan euskararekiko eta literaturarekiko atxikimendua errotzen lagundu zuen argitaletxe mitikoa” --Aburto alkatearen hitzetan--; eta, halaber, Posta kalean dirau Bilbo Zaharra euskaltegiak, azken urteotako Bilbo euskalduntzearen lekukoak.
Hain zuzen ere, zenbait astebete barru, Udalak plaka bat jarriko omen du, Posta kalean, jakina --17. zenbakiaren parean--, “Eguna egunkariaren epopeia hura Bilboko memoriari atxikita geratu dadin betiko”.