Hirurogei urteko kazetari-lana*
Euskal kazetaritza ikaragarri aldatu da azken 60 urteotan, Miren Jone Azurzaren magalean gerra osteko kazetaritza modernoari ekin genionetik. Mende erdi luze, haren buruzagitzaren eraginez “Zenbat Gara” saila indarrean jarri genuela “Zeruko Argia” astekarian, oraintsu Roberto Mielgok osorik bildu eta digitaldu duena, gaurko kazetaritza-ikasleek orduko “Euskal Kultura Berriaren Kronika” ezagutzerik izan dezaten.
Euskal kazetaritza ez izatetik izatera pasatu da, azken mende erdi honetan. Gogoan izan demokrazia indarrean jarri arte prentsaurreko guztiak gaztelania hutsez zirela, baita euskal gaien ingurukoak ere. Prentsaurrekoetan euskaraz galdetzeko aukera eman zuen lehena Euskaltzaindia izan zen, 1976an, eta ETB sortu (1983) zenerako Amatiñok 20 urte zeramatzan kazetaritzan.
Segurutik teknologia-iraultza sekulakoa izan da azken bost-sei hamarkadotan, baina, aldaketarik handiena euskararen taxuzko eta ganorazko erabilpena izan da, Euskal Herriko Unibertsitatearekin batera hazitako belaunaldi berriari esker. Paperez, irratiz, telebistaz, pantailaz edo sarez, inoizko mailarik handiena eta eskaintzarik zabalena dugu gaur egun euskal plazan.
Hala ere, kazetariak, aurkezleak, idazleak eta aktoreak garrantzitsuak baldin badira ere, ezin ahaztu gero, lehen ekoizle, programagile eta teknikariak. Pantaila aurrean sekula agertzen ez direnak ez baleude bastidore artean, ez genuke inoiz ezer egituratzerik izango. Dena asmo hutsa baino ez litzateke izango.
Agur eta ohore azken hirurogei urteotan euskalgintzaren eremuan lan egin duten guztiei, letretakoak nahiz teknika alorrekoak izan. Gaur egun jende gehiagok dihardu euskalgintzaren inguruan lan egiten, Irulegiko eskuaren garaietatik Gernikako Estatua indarrean jarri arte baino.
Egun, dena da orain dela hirurogei urte ez bezala. Baina bada, eta orduan baino nabarmen hobea eta hobeto.
*Jolasean hasi (1963) eta dantzan amaitu (2023).
- Itziar Mena, Eugenio Iriondo, David Barbero, Josu Jon Imaz, Iñaki Zabaleta, Luis Aranberri, Luis Mendizabal, Carmen Peñafiel, Patxi Baztarrika eta Amaia Goikoetxea
- Bilbo, Donostia eta Gasteizko kazetariak, 2023ko irailaren 21eko omenaldian.
- Sara Calvete, M. Carmen Lauzurika, Aner Garmendia, Luis Aranberri, Iñaki Garmendia, Marina Garcia, Eduardo Urizar eta Susana Movellán
Gazte-gaztetandikan, enpresari fina, laster sortu zitzaizun, euskararen grina
Zeruko Argia Deia, beti nekaezina, ETB sortu zenun, gure lagun mina.
Bikote izan gara, Amatiño ta Imaz. Jaurlaritzan, EAJtan, lanean irrikaz.
Petronorren berriro, elkarrekin luzaz, eskerrik asko maixu, harro nago zutaz.
Esku zabal zarela, guztiek dakite, zure bihotzak ez du, ez muga ez limite.
Agurtzean begiek, negarra dagite, hain zara miresgarri, hain zaitugu maite.
Josu Jon Imaz. Bilbon, 2023ko irailaren 21ean.
---ooOoo---
