Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Gurea, goooooooool… inorena, gola

Gurea, goooooooool… inorena, gola

Amatiño 2017/01/24 00:05
Euskadi Irratiak zuzenean eskaini ohi dituen futbol-partidak entzun baino ez dago konturatzeko, oro har, bi eratako golak izaten direla partidetan. Kanpoko taldeek hemengoei sartzen dizkietenak golak dira, goibelak eta laburrak. Euskal taldeetako jokalariek egiten dituztenak, ordea, gooooooooooool… ozenak eta luzeak. Baina bada beste bereizkuntza nabarmen bat ere: inorena gol mugatua izaten da, gola; gurea, aldiz, gol mugagabea, gol.

Euskal familietan mutikoa jaiotzen denean, denok elkarri esan ohi diogu: mutila. Inork ez du “mutil” esaten, nahiz gaztelaniaz, adibidez, “chico” esan, eta ez “el chico”.

Tradizioak dioenez, Colonen espedizioan, Ameriketako muinoak estreinako ikusi zituen marinelak zera oihukatu omen zuen: “tierraaaa!”. Euskaraz adierazi izan balu, esango zukeen, segurutik: “lurraaaa!”. Inondik ere ez, jakina, “lur”!

Euskal ehiztariak usotara joaten direnean goizean goizo, txara artean ezkutatu ohi dira noiz egunsentiarekin batera lehen hegaztadak agertuko. Eta, aurrena sumatu bezain laster, zelatariak ohartarazi izaten du, ahopeka: “paloma, paloma!”, gaztelaniaz; eta “usoa, usoa!”, euskaraz. Sekula ez, ordea, “uso, uso”.

Euskadi Irratiko esatariek, berriz, gol eta gola aldaerak erabiltzen dituzte, gola nork egiten duenaren arabera. Bartzelonako jokalarien gola baldin bada, esaterako: “Neymar… Suarez… Messi... eta gola”, etsipenak jotako gol triste, isil eta motza, baina beti ere gola, jakineko gola, mugatua. Haatik,  Athletic-ek (edo beste edozein euskal taldek) egindako gola baldin bada, berriz: “Susaeta… Muniain… Aduriiiiz… gooool….. goooooooooooooooool!”, pozez zoratzen kantatutako gol(a), baina beti, gaztelaniaz bailitzan, GOL, nahiz euskaraz aritu.

Eta Haritz Gallastegik, Maitane Urbietak, Rafa Mungiak eta konpainiak gola kantatzerako orduan hitz osoa esango balute… Alegia, gooooooooooooooolaaaaaaaaaaa?

Gari Araolaza
Gari Araolaza dio:
2017/01/24 14:55
Detaile polita Amatiño, bai hobe horrela.

Badira horrelako beste hainbat, Euskotren adibidez, eta hainbeste ernegatzen gaituen Euskalmet-en "elur, euri eta haize" (sic) https://twitter.com/hashtag/haize (Gainera orain konturatu naiz normalizatu direla eta beste erakunde batzuek ere erabiltzen dituztela)
Amatiño
Amatiño dio:
2017/01/24 15:30
Eta inork esan al die, inoiz, zuzentzeko?
Gari Araolaza
Gari Araolaza dio:
2017/01/24 16:13
Amatiño
Amatiño dio:
2017/01/25 21:55
Ez dakit kasu ezberdinak ez ote diren... hashtag horiek ez baitira nolabaiteko esaldi edo perpausaren baten parte, etiketa soil bat baino. Denok ezagutzen ditugu Izar, Ur, Lur, Elur, Hodei, Leize, Zigor eta Amets pertsona-izenak eta, zer esanik ez, era horretako txakur edo katu-izenak (Beltz, Zuri, Kixkur, Salkin, Ardi, Txukun...). Ez diot inori entzun begiko edo belarriko minik egiten dienik.

Honekin ez dut esangura nik, aukeran, hashtag horiek aukeratuko nituzkeenik, baina ahaleginduko naiz galdetzen zergatik diren horrela.
Serafin
Serafin dio:
2017/01/26 18:35
Errazoia daukak. Gauza bera "futbolian jolastu" eta "pelotan jolastu" jokatu erabili biharrian ze fubolarixak jokalarixak dittuk eta joko ona edo txarra erabiltz<en juek, berdin pelotarixekin.
Sosola
Sosola dio:
2017/01/28 12:50
Bai Amatiño neri demaseko belarriko mina emoten desta animalixeri holan deitzia. Hori be kontu barrixa izango da. Gure etxeko animalixen izenak: baltza,xarpa, apala, gorrixa,...Eta aberiei pertsonen izenak esaten entzutian (Izar, Urko,...) barreguria.
Baina, futbol-esatarixen kontuakin beste zera bat: Gallastegi piska bat zalbauko neuke baina bestiak benetan eskasak begittatzen jataz. Pentsatzen dabe telebistari begira gaozela eurekin batera. Ni futbolero xamarra izanda (lehenagoko aldian erdixa bez) faltan botatzen dittut radixutik partiduak ikustaraztezkuen harek, ixa danak erderazkuak jakina:Josean Alkorta, Tito Irazusta, Josetxo Lizartza,...Goguan dakat nere ikaskide batek, Sixtok be Eibar 2Bn puntan zebillenian polito egiten zebala kontakizuna, honek be euskeraz. Ez dakit igual nere burutazioak dira,baina nik biharrrian, beti dakat radixua ixorik eta estimauko neuke kontakizun zehatzagoa, Alfako sirenia baino GOl-orru ozenagoaz gain.
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Amatiño

Luis Aranberri Mendizabal