Gora gu eta gutarrak
Gustuko edo ez, gauzak diren bezalaxe dira, eta aldatzen ez diren artean behintzat nik ez diot ezein euskal kirolariri munduko txapelduna izateko aupadarik ukatuko. Bai, seguru gero guzti honetan erabilpen politikorik ez dela falta eta jakin badakit hainbat jarrera zeharo lotsarri direna baina, zer gerta ere, gehiegikeria horiek ez onartzea –eta salatzea— gauza bat da eta darizkien probokazioetan jaustea beste bat. Gehiegikeriez beraiek galtzen dute; probokaziotan eroritzen naizen neurrian, aldiz, beraiek irabazten dute.
Edozein modutan, ez gero ahaztu zein elastikoz irabazi zituzten Indurainek eta Olanok euren urrezko dominak, batere espanturik gabe irabazi ere; eta gogoan izan gero beira-arasetan Generalísimo Francoren koparik gehien duten klubetakoa gure Athletic bera dela zalantza izpirik gabe.
Hiru xemaiko alukeriak esateari ekin aurretik, bakoitzak pentsa dezala zer egingo ote lukeen Del Bosquek dei egingo balio edo, hobeto esan --are nabarmenago-- deitua semea balitzaio.
Kontua ez da onenak irabazi dezala. Nik geureek irabazi dezaten nahi dut, onenak izan ez arren, Herbehereetan ez zait-eta ezertxo ere galdu.
Zurea irakurrita ematen du, Amatiño, zuk bezala pentsatzen ez dugunok, "erabilera politikoagatik" ez dugula pentsatzen zeuk bezala eta ezer esaten hasten bagara, "Hiru xemaiko alukeria" esateko arrisku bizian gaudela, zeu ez bezala. Baliteke, ez dizut nik ezetzik esango, baina esango nuke irmotasun espresibo lodiegi hori, zor zaiola zeure estilo hanpuztu betierekoari, beste ezeri baino. Hala ere, partidarako istant batzuk baizik falta ez diren honetan, utz ikezadazu esaten, Alonso, Llorente eta enparauak jokoan izan arren, ni neu Herbehereen alde nagoela gaurkoan. Izan ere, Espainiako Selekzio horrek, geure euskal selekzioa antolatzen uzten ez digun estatua ordezkatzen du, zeuri iruditzen zaizuna iruditu. Dei iezaiozu politika, alukeria edo zeuk nahi duzuna, baina horixe da hemen gertaera nagusia, euskal selekzioa antolatzen ez digutela uzten. La Rojak irabazita pozten bazara zeure kontu da hori eta gozatu. Ez zara bakarra izango. Baina jakizu beste batzuk ere bagarela zu ez bezala sentitzen dugunak. Campeón.