Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Gallastegiri zor zitzaion gorazarrea

Gallastegiri zor zitzaion gorazarrea

Amatiño 2013/12/24 16:15
Gallastegi pilotariaren gaineko liburua atzo aurkeztu genuen, Coliseoan. Ez naiz ni aukerakoena ezer esateko baina, itxura guztien arabera, “oso ondo” egon omen zen dena: laburra, hunkigarria eta “neurri-neurrixan”. Horra, azkenik, aspaldidanik zor zitzaion gorazarrea.
Gallastegiri zor zitzaion gorazarrea

Liburu-azala

Liburua ez da, horratik, Migel Gallastegi eibartarraren biografia soila; baita azken hirurogeita hamar urteotan Migelek berak, bertatik bertara, pilota-munduan bizi, ezagutu eta sumatu izan dituen aldaketen kontakizuna ere.

Gure Migelek 1940etik 1960ra bitarteko bi hamarkadetan jardun zuen pilotari. Hasiberritan ezagutu zituen gerra aurreko atanotarrak, etxabetarrak, Felipe, Mondragones, Urzelai, Kortabitarte, Txikuri eta bestelakoak. Eta 1960an erretiratu zenean indarrean laga zituen Garzia Ariño I, Arriaran II, Ogueta, Azkarate, Retegi I eta ondokoak. Tradizioaren eta modernitatearen arteko zubigilearenak egitea egokitu zitzaion Asolaigartzako mutiko lerdenari.

Gallastegik pilotari ekin zioenean ez zen ez entrenamendurik, ez gimnasiorik, ez dutxa berorik frontoietan, ez urteroko txapelketarik, ez ganorazko esku-babesik, ez gomazko zoruerdiko oinetakorik. Gallastegiren ondotik, berriz, ariketak, kontrolak, janzkerak, frontoiak, pilotak, soldatak, enpresak eta… kazetariak aldatu ziren. Eta Migelen ustez, ez beti onerako, ez beti pilota-jokoaren mesedetan.

Liburua aproposa suertatuko da, segurutik, pilotazaleentzat; baina ez gero pentsa, gezurra dirudien arren, egileak pilota-jarraitzaileak izan dituenik gehienbat gogotan. Nire ustez liburuaren hainbat pasarte ezin aproposagoak eta irakurgarriagoak gertatuko zaizkio adineko irakurle eibartarrari, pilotazale izan ala ez izan. Azitaingo Dolores, Don Poli edo Alfako Jose Arriola “Etxebarri” ezagutu zituen eibartarrak gustura irakurriko duelakoan nago, edo “Giputzanekuan” zein Eperranekuan” txikito batzuk jotako belaunaldiak. Inor gelditzen al da honezkero? Liburuak ia laurehun orrialde-oin biltzen ditu sekula gehiago itzuliko ez diren garaien eta lagunen adierazgarri eta gogoangarri.

Migelen senitartea pozarren zen atzo, liburuaz zein ekitaldiaz, zaharrari zor zitzaion omena eskaini zaiolako, behingoz. Pena gero, 95 urte bete arte itxaro behar izana. Baina, tira, hobe omen berandu, sekula baino.

Mahai osoa

Carmen Larrañaga, Ego Ibarra batzordearen lehendakaria; Miguel de los Toyos, alkatea; Luis Aranberri, idazlea, Migel Gallastegi bera eta Pedro Mari Goikoetxea, ETBko kirol-kazetaria

Hiruak

Pedro Mari Goikoetxea kazetaria, autorea elkarrizketatzen

Oier Gorosabel Larrañaga
Oier Gorosabel Larrañaga dio:
2013/12/25 09:40
Amatiño, argazkixak ez dozuz ondo ipiñi; "pribau" modura kargau dozuz flickrren, eta zuk baiño ezin dozuz ikusi.

Bestalde zorionak, liburuak kriston itxuria daka.
Serafin
Serafin dio:
2013/12/25 22:29
Zoragarrixa egin jakon omenaldixa, ondo merezittakua horraittiok! Oso ondo juan izan zuan dana, heu be egoki eibartarron berbetan, gustora egon nintzuan eta liburua primeran dagok, sekulako informaziñua dagok hor. Txalo zaparrada itzala jaso juan Migelek, hunkigarrixa! Eskerrik asko Luis Alberto, primerako biharra hiria.
Amatiño
Amatiño dio:
2013/12/25 23:31
Nik barruko tripez ez jakixat bape. Baina bajakixat:
1. Nik (oso oker ez banagok) beti egiten dotela bardin. Dakidan modu bakarraz. Ez jakizat beste modurik.
2. Eibar.org honetan arazoak dagozak atzenengo aldaketak egin ziranetik. Esan jesten google laga eta mozilla firefoxez egiteko. Nik mutil zintzoa nok eta kasu egin juat. Baina horreaz arazoa ezkutatu baino ez juagu egin. Kontua zera dok, mozilla-firefox zaleak ondo ikusten juek, baina googleaz jarraitzen dabenok ez.
3. Azken egunotan argazkirik ez badok ikusten, ez jakixat zergaittik. Baina nik ez juat ezer aldatu.
4. Nerean be hasi dituk agertzen "flickerren" barruko oharrak. Baina "pribautasuna" kendu jetset, eta bardin jarraitzen jok.
5. Oso tristea dok norberak ezagutzen ez dittuan gaiez berba egitia. Horretara, isildu nadin, eta kito.
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Amatiño

Luis Aranberri Mendizabal