Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / "Fracking" eztabaidagarriak nazioarteko oreka aldatuko

Amatiño

"Fracking" eztabaidagarriak nazioarteko oreka aldatuko

Amatiño 2012/11/26 10:30
Hurrengo Energia sailburuak abian aurkituko dituen egitasmoetako bat izango da Araban arbel-gasa ateratzeko "fracking"-sistema, eta erabakiren bat hartu beharra aldeko zein aurkako arrazoien artean. Auskalo zer gertatuko ote den baina ez dut uste, maldan beherako giro honetan, 30.000 milioi euro balio omen duten gas-erreserbak patata-soropean geratuko direnik, noiz helduko pikuak Otxandion.

Azken lau urteotan Energia sailburuorde izan dugun Xabier Garmendiak aditzera eman bezala, Arabako hainbat sorotako lurpean 185.000 milioi metro kubiko arbel-gas daude. Hau da, eurotan, 30.000 milioi adina eta Euskal Autonomia Erkidegoaren hirurogei urteko gas-kontsumoa beste. Datuok ikaragarriak dira. Ez dago egiazko ekonomiarik zifra horiei ez ikusi egingo dienik.

Frackingik ez lelopean arabar arbel-gas hori ustiatzearen aurkako taldeak eta elkarteak indarrean jarri dira hasiera beretik, teknika arriskutsuez lurpean egin beharreko haustura hidraulikoak eta zulaketa horizontalak kalterako baino ez direlakoan. Xabier Garmendiak adierazi izan du, ordea, ustiatzeari ekin aurretik izan daitezkeen arrisku guztiak ikertu eta aztertuko direla, beti ere Europar Batasunak ezinbestekotzat jotzen duen "zuhurtasun-hastapena” gogoan hartuz.

Energiaren geoestrategia aldatzen ari

Bitartean, onerako nahiz txarrerako, batere zalantzan ez dagoena zera da: oraintsu arte ezezaguna zen fracking deitu ustiatze-sistema honek aldatu duela honezkero munduaren energia-oreka.

Energiaren Nazioarteko Agentziaren datuei bagagozkie, hidrokarburu ez-egiunezko hauei esker, munduko lehen gas-ekoizlea EEBB izango da, 2015 urtean, Errusiaren gainetik; eta lehen petrolio-ekoizlea, berriz, 2017an, Saudi Arabiaren aurretik.

Honek esan nahi du, EEBBk, egun, bere petrolio-kontsumoaren %60 inportatzen duen arren, %25 besterik ez duela kanpoan erosiko. Eta, orain, gas-kontsumoaren %10 erosi beharrean badago ere, ondoko urteetan %5 esportatu ahal izango duela.

Edo, nahi bada, beste modu batez esanda, EEBB berriro ere munduko herrialderik ahaltsuena izaten jarraituko duela, Txinaren aurretik; iparamerikarrek utzi ahal izango diotela Ekialde Ertainean erosteari; ondorioz herrialde arabiarrenganako menpekotasuna zeharo murriztu eta orain arteko oreka geoestrategikoa aldatuko dela, besteak beste fracking sistemari esker.

Eta ez dut uste geoestrategia-politikaz, haustura hidrauliko teknikaz edo ez-egiunezko hidrokarburuez lar jakin behar denik pentsatzeko, dugun krisi honekin eta Europar Batasunaren irizpideei muzin eginez, 30.000 milioi euro lurpean gorde ahal izango ditugunik.

fracking

Haustura hidraulikoa eta zulaketa horizontala

Oier Gorosabel
Oier Gorosabel dio:
2012/11/26 21:48
Interesgarrixa. Gai honen jarraipena hamen egitten gabiz Euskal Espeleologuen Elkarguan http://www.euskalespeleo.com/[…]/viewtopic.php?f=9&t=326
Luistxo Fernandez
Luistxo Fernandez dio:
2012/11/27 09:15
Dokumental hau fracking-aren kontrakoa da, eta ikusteko gogoa daukat: http://azpitituluak.com/euskaraz/1349791342
jaime
jaime dio:
2012/11/27 18:35
 Xabier Garmendiak adierazi izan du, ordea, ustiatzeari ekin aurretik izan daitezkeen arrisku guztiak ikertu eta aztertuko direla, beti ere Europar Batasunak ezinbestekotzat jotzen duen "zuhurtasun-hastapena” gogoan hartuz.
Oso ongi, baina nire galdera da: frackinga erabili aurretik, nola ziurta daiteke ez direla inguruko akuiferoak kutsatuko aipatutako teknikak erabiltzen ohi dituen gehigarri kimikoez? Ez al genituzke fracking-en eraginak "a posteriori" ikusiko?
30.000 milio euro ez da gauerdiko ahuntzaren estula, ez horixe, baina ez al litzateke askoz dramatikoago gure ur edangarrien erreserbak hipotekatzea?
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna: