Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Ezker abertzalearen froga-harririk eza

Ezker abertzalearen froga-harririk eza

Amatiño 2014/09/27 00:05
“Ezker abertzaleak ezer nabarmenik egin badu azken urteotan zera da: Herri hau irteera gabeko zulotan sartzen jardun” –leporatu zion Joseba Egibarrek Hasier Arraizi, Eusko Legebiltzarraren azken bilkuran. Eta, nago, andoaindarrak zeharo asmatu zuela. Izan ere, eztabaidagarri izan daiteke azken berrogei urteotako estrategia nahita ala nahiezta jarraitu ote duen ezker abertzaleak, baina jarraitu izana ez dago zalantzan. Eta politikagintzan, behintzat, antologiazkoa haren froga-harririk eza.

Ezker abertzaleak irteerarik gabeko eskaintza gatazkatsuak egiteko trebetasuna izan du sortze beretik: amnistia orokorra hutsaren hurrengotzat jo, haustura demokratikoa proposatu, borroka armatua hil ala bizikotzat onetsi, herri-erakundeak arbuiatu, euskal lurraldetasuna batere zirriturik gabe aldarrikatu, gainerako alderdien hautuak gutxietsi… Denak ere –Herriaren izenean-- ezinbestekotzat omen ziren jokabideak eta, gero, batere argudiorik edo azalpenik gabe, egun batetik bestera firin-faran esne-berbetan urtu, ahaztu edo gozatu direnak, nonbait.

Ezker abertzaleari ia berrogei urte kostatu zaio 1970eko hamarkadan abian jarritako demokraziaz baliatzea, armen estrategiaren ezintasunaz konturatzea, erakundeen ahalmenez jabetzea eta euskal lurraldeen hiru erritmoak aitortzea. Orain, aurrerantzean, auskalo zenbat urte gehiago behar izango ote dituen ohartzeko, politika politika baino ez dela, norberarenak bezain zilegi direla gainerakoen hautuak eta euren proposamena bat gehiago besterik ez dela.

Hain zuzen, azken berrogei urteotan erakutsitako esperientziaren ondotik, ezin esan, inondik inora, ezker abertzalea izan denik proposamenik emankorrena jorratu, lorpenik oparoena erdietsi edo bermerik gehien eskaini duena. Eta, ondorioz, aurrera begira, ezta estrategia politikorik sinesgarriena asmatu dezakeena ere.

Ezker abertzaleari edozein zuzi gartsuren argimutil izatea gustatu ohi zaio; froga-harria eskatzerako orduan, ostera, nahiago izaten du piper egin.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Amatiño

Luis Aranberri Mendizabal