Euskal hidrogeno berdea abian
Teknologia berri honen baitan dagoen filosofia zera da: hurrengo bizpahiru hamarkadetan ezin izango da energía-sistema guztia “argindartu”. Ez behintzat hegazkinak, itsasontziak eta errepidetako garraio handiak. Ezta energia-kontsumo eskerga duten industria-sektoreak ere, kimika, altzairu eta zementugintza, esaterako. Hartara, etorkizuna ezin izango da bi alternatiba kontrajarriren artean soilik bideratu.
Josu Jon Imaz Repsolen CEOak esan bezala, “ondoko belaunaldian, dena ezin izango den arren elektrifikatu, nahitaez dena deskarbonizatu behar izango da, ordea. Ezin besteko giltza, bioerregaiek, erregai berriztagarriek eta erregai sintetikoek izan beharko dute”.
Aldi berean gogorarazi du, Euskadik azken hiru belaunaldiotako industria-apostuari zor diola gaur egun bizi duen ongizatea, eta, Estatu Batuei aurre egingo bazaie, Europako industria eta teknologia eraberritzea derrigorrezko erronka izango dela, harako teknologia-neutraltasuna tarteko. Lopez Atxurra Petronorren presidentearen hitzetan: "ez dago energia-trantsiziorik industria-estrategiarik gabe".
*Elektrolisiaz, argindarrak uraren molekula hausten du, hidrogenoa lortuz. Oxigenoa da prozesuaren hondakin bakarra.