Euskal enpresarik hedatuenetakoaren ahalak, hamabi hizkuntzatan
Orain dela ozta-ozta urtebete aurkeztu zen, Deustuko Unibertsitatean, “EGA Master kasuaren metodoa” saiakera non munduko esku-erreminta fabrikatzailerik zabalduenetakoa den euskal enpresa honen nondik norakoa laburbiltzen den eta haren arrakastaren oinarriak eta zutabeak jakinerazten.
Bizpahiru urtetan Luis Aranberrik moldatutako saiakerak Deusto Business School negozio-eskolaren onespena jaso zuen eta baita beronen “praktika onetako” sail berriaren barrena babespean hartu eta argitaratu ere, euskaraz eta gaztelaniaz.
Ondoko hamabi hilabetetan beste hamar hizkuntzatan argitaratu da (ingelesez, frantsesez, portugaleraz, italieraz, alemanez, errusieraz, arabieraz, hebraieraz, txineraz eta japonieraz, alegia) eta hamabi argitalpenon aurkezpen bateratua egin zen aurreko ostegunean, Madrilen, Deusto Business School-ek berak espainiar hiriburuan duen egoitzan.
Iñaki Garmendia eibartarrak (Otxandion jaioa) sortu zuen EGA Master 1990an, Gasteizen, eta hogeita bost urte geroago enpresarik aitzindarienetakoa da fabrikazio-moldeetan, ikerkuntzan zein garapenean, eraberrikuntzan, langileen konpromisoan eta bezeroekiko harremanetan. Hau guztia gutxi bailitzan, euskal enpresen artean nekez konpondu izan den arazoari ere, belaunaldi arteko jarraipenari alegia, erantzun egokia ematen asmatu du.
EGA Masterrek bere koizpenaren %90 esportatzen du, bost kontinenteetako 150 herrialdetan zehar, eta %40, berriz, Afrikan, Asian eta Hego Ameriketan suspertzear dauden herrialdeetan. Merkatu hasiberri hauetako enpresarik gehienak familiarrak dira eta, EGA Master ere familiarra denez gero, liburu hau prestatu nahi izan da munduan barrena, oro har, eta enpresa familiarren artean, bereziki, euskal enpresaren sorrera, ideologia, egitura, ahalak eta zerbitzuak zertan diren lau haizetara zabaltzeko.
Hamar berrietako zortziren azalak, portugaleraz, txineraz, alemanieraz, arabieraz, ingelesez, japonieraz, frantsesez eta errusieraz