Europako musika-topaketarik zaharrenetakoa
Musika Hamabostaldia, Donostian bertan hasi bazen ere, operaren ildotik eta bi astez, gaur egun beste edozenbat musika molde (orkestra, ganbera, abesbatza, balleta, dantza, organoa, interprete gazteak, garaikidea, antzinakoa, ibiltaria…) biltzen ditu, lau astean zehar eta, Donostian ez ezik, baita Gipuzkoan, Araban, Nafarroan eta Iparraldean barrena ere.
Donostiako Musika Hamabostaldia gutako gehien-gehienok baino zaharragoa da eta, behar bada, betidanik “hor” izan dugulako, ez gara konturatzen Euskal Herri osoko berriketa gabeko kultura-altxorra denik eta oinarrizko erreferentzia, Europan.
Zirraragarria, benetan, larunbat arratsean, Senpereko Saint Pierre elizan, Donostiako Orfeoiak eskaini zuen saioa. Gabriel Fauré-ren Requiem-az jakineko maisutasuna azaltzeaz gainera, Tomás Aragües (Ave Maria), Pau Casals (Nigra sum) eta Aita Madina (Aita gurea) konpositoreekin entzuleak bereganatu zituen, Leonard Cohen (Hallelujah) eta Georg Haendelekin (Aleluya) erabat irabazi gintuen eta, Maitia nun zira eta Agur Jaunak herri-kantez, azkenik, eliza-sapaia erauntsi.