Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Europa, bertatik bertara

Europa, bertatik bertara

Amatiño 2017/03/09 00:05
Aspaldiko partez, Euskal Herria Europara begira jarri da aho batez. Behingoz! Alain Rousset, Iñigo Urkullu eta Uxue Barkos presideenten arteko batzarrak, Bordelen, inoiz baino sendoago bildu ditu, elkarrekin eta norabide bertsuan, Bidasoako mugaren inguruko herrialdeak.

Harrigarri da gero, arrazoi batez zein bestez, zein zail suertatzen diren sarri, berez edo logika hutsez erraz asko gatzatu beharko luketen egitasmoak. Izan ere, zein beste alternatiba geoestrategikorik izan dezakete Akitaniak, Euskal Autonomia Erkidegoak eta Nafarroak, elkarrekiko sinergiak areagotu baino? Segurutik Europar Batasuna ez da kristoren panazea baina… zer arraio egin Europar Batasunari bizkar emanez gero? Edo, beste modu batez esanda, Europari muzin egitekotan, zeri amore eman?

Nonbait ahaztu nahi dugu, edo ez dugu ikasi nahi, Europar Batasunaren oinarri oinarrizko lehen proiektua barne-mugetako herrialdeetan jaiotako pentsalarien ideia izan zela. “Historiaren zauriak” jasan behar izan zituzten herrialdeetako buruzagi politikoen etorkizun-erronka.

Robert Schuman, Alcide Di Gasperi eta Konrad Adenauer, Europar Batasunaren hiru arbaso nagusi edo lehen aita pontekoak, hiruak ziren muga-gizonak. Schuman, lorrenarra, alemaniar jaio zen eta frantses hil, bizitzan zehar lehenik frantsez eta gero alemaniar izan ostean. Trentino-Adigeko Di Gasperi Austriako legebiltzarkide izan zen gaztetan eta Italiako presidente, ostera, nagusitan. Eta Adenauer, berriz, erdipurdiko alemaniarra nonbait, lehen eta behingoz renaniar gisa hitzegin ohi zuenez gero.

Auskalo Algarven edo Clermont-Ferranden erraza ala zaila ote den nork bere burua europarzaletzat jotzea, baina… Baztanen?

jaime
jaime dio:
2017/03/09 15:00
Zer? Ahaztu egin zaigu zazpigarren mendean Euskal Herriak eta Akitaniak baturik Baskoniako Dukerria osatu zutela? Argi da Euskal Herri osoak (Hegoak eta iparraldeak) joan behar duela Akitaniarekin batuta. Ba al dago gauza logikoagorik?
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Amatiño

Luis Aranberri Mendizabal