Ertzaintzarentzako “eredu zibila”
Estefanía Beltrán de Heredia
Orain dela hogeita hamar urte, Ertzaintzaren lehen andana (1982) kaleratu zenean, espainiar poliziaren tankera baino, britainiar “bobby"en eredua jarraitu beharra aldarrikatu zuen hainbatek. Eta Eli Galdos oñatiarrak, orduko Herrizaingo Sailburuordeak, erantzun zuen ironia handiz: "ondo dago ertzainak britainiar poliziaren pareko izan daitezen eskatzea. Saiatuko gara haien ospea merezi dezagun. Orain, euskal gizartea britainiarraren pareko izatea besterik ez zaigu falta".
Ezin esan, gero, azken hogeita hamar urteotan oso "britainiarrak" izan garenik. Aukeran, ea hurrengo beste hogeita hamar urteetan zertxobait baretu-edo egiten garen, patxada apurren batez jabetu, eta nolabaiteko errutina zibilen bati ekin. Orduan bai, orduan ertzaintzari ere samurrago egokituko zaio Estefania Beltrán de Heredia Segurtasun sailburuak amesten duen zorioneko eredu zibila.
Eli Galdos, 1995ean, Gipuzkoako Ahaldun Nagusi zela, eta Jesus Alberdi, Elkargiren zuzendari nagusia
1º- Gizalege gehiago herritarrekiko tratuan. “Oye tu...” eta horrelako nabaskeriak baztertzea. Etxekoak ditugu ertzainak baina, sarritan, guardia zibilek duten gizalegea eredutzat edukitzea ez litzaieke txarto etorriko.
2º- Ertzaintzaren uniformearekiko errespetua. Zerbitzuan dagoen agente batek ongi uniformatua izan behar du, esan nahi da: lotuta egon behar diren botoiak lotuta izatea, txapela beti buruan (eta nola ipintzen den ikastea).
3º- Kontuan har dezatela euskara dela Euskal Herriaren jatorrizko hizkuntza. Kontuan hartuta, halaber, duela mende erdi bat ikastolen mugimendua hasi zela, ez da onartzekoa ertzain batzuen “ ikasten ari naizka “ desenkusa famatu hori euskaldunekin aritzen direnean. Euskaldunekiko errespetu eza izugarria dela iruditzen zait. Gaur egun euskaraz ez dakiena interesatzen ez zaiolako da.
Zilegi bekio horrelako kritikak egitea, gogo eta harrotasun handiz, 24 urtez Eusko Jaurlaritzako Barne Sailean, haietariko 5 berrozi gisan, lan egin zuen bati.