Energia paradigmaz aldatzen ari denik ezin uka
Aurreko urrian Repsolek eta EEEk (Energiaren Euskal Erakundea) elkarrekin sinatu zuten “argindartegiak” han-hemenka zabaltzeko Ibil egitasmoa, auto elektrikoek argindarra kargatzeko aukera izan dezaten zerbitzua. Eta galdera zera izan zen: zer egiten du gure merkatuan gasolina-zerbitzugunerik gehien duen konpainiak argindar-zerbitzuguneak jartzen?
Logikarik ez zaio falta. Iberdrolak baldin badu argindarra eta Repsolek ezantza… nori legokioke zerbitzugunetan argindarra eskaintzea? Zeini zaio errazago, gasolindegidunari argindarra ere eskaintzea ala argindargileari han-hemenka argi-zerbitzugune berriak zabaltzea?
Era berean, itsas-haizerroten teknologia itsas-plataformetan oinarritzen da. Zeini dakioke errazago, haize-errotak dituenari itsas-plataformak egitea ala petrolio-plataformak itsasoan jartzen urteak daramatzanari haize-errotak itsasoan bertan ezartzea?
Iazko apirilean Repsolek Energia Berriak deitu lansaila sortu zuenetik, petrolio-konpainiak energia-katedra sortarazi zuen Bilbon (maiatzean); bioerregaiak egiteko AlgaEnergy enpresaren %20 erosi (abuztuan); Eusko Jaurlaritzarekin batera Ibil egitasmoari ekin (urrian); 40 milioi euro ezarri Mexikon, jatrofa-erein eta bigarren belaunaldiko bioerregaiak ekoizteko (azaroan); Espainian zehar 80 gasauto edo gas-zerbitzugune zabaldu (martxoan); 83,5 milioi euroz euskal kogenerazio-sistemarik handienetakoa (Garoñaren %25 beste) indarrean jarri (maiatzean) eta orain Eskoziako SeaEnergy enpresa 57 milioitan erosi (ekainean).
Auskalo energia-aldaketa azkar edo soseguz gertatzen ari ote den (bakoitzak jakingo du zenbat gauza egin duen berak azken urtebetean), baina energia paradigmaz aldatzen ari denik ezin behintzat uka.
