Eibarko Klub Deportiboaren dantza-taldea Gipuzkoako txapeldun 1952an.
Eibarko Klub Deportiboaren dantza-talde osoa, 1952an. Ezkerrean, Jose Luis Perez Sarasketa txistulari eta eragile amorratua, eta eskuinean, berriz, Gregorio Santa Cruz, guztion maisu mitikoa.
Mutikoak, 1945eko kintakoak-edo, batez beste. Guztiok ere aurten 80 urte beteko dituztenak, gutxi gora behera. Neskak, ostera, hamarren bat urte-edo nagusiagoak, orain 90 urteren bueltan eta, hartara, ezezagunak beheko mutikoentzat. Hala ere, tartean dira Arrate Artamendi, Riaño, Mari Tere Salinas, Berraondo, Isabel, Carmen… Inork izenik zehaztu nahi izango balu, esan baino ez du.
Barreneko mutikoak, ezkerretik eskuinera, zutik: Mikel Larrañaga, Zana, Jose Mari Usatorre, XX, Migel Espilla, Viteri, Mikel Elorza eta Manuel Lecona. Makurtuta, Pedro Artamendi, Ramon Idigoras, Pello Gisasola, Roberto Ruiz, XX, Juan Mari Usatorre eta XX.
Urte hartan, neska-taldeak irabazi zuen, Donostian, Gipuzkoako Lehen Saria, eta, Isabelita Perón tarteko, jaso zuten Argentinara joateko gonbitea. Ez zuten, ordea, joaterik izan, ordurako hainbat neska beharrean hasia zelako.
Elena 1953an jaio zen, goiko argazki hori baino urtebete geroago, baina 1960ko hamarkadan zehar dantzan jardun zuen Gregorio Santa Cruz maisuaren esanetara. Nonbait estimu handitan zuen maisu handiaren ardurapean dantzatu izana, bere etxean ageriko lekuan baitzuen dantzari ageri zuen argazkia.
Elenaren errautsak Arraten zabalduko dira, bere gogo dantzariak maite zuen inguru-minguruan.