Egiaren hegiak
Benetan jazotako gertakarietan oinarritua da James Vanderbilt zuzendariaren Truth filma hau. CBS katearen “Sixty minutes” programak susmatu zuen, 2004 urtean, George W. Busch lehendakari-gaiak azpijokoz edo ezkutuko gomendioz lortu zuela, gaztetan (1972), Vietnamgo gerrara joan beharra saihestea.
Itxura guztien arabera susmoa egia bilakatu zen arren, Dan Rather (Robert Redford) aurkezlearen eta Maria Mapes (Cate Blanchett) ekoizlearen lan-taldeak ezin izan zuen ehunik ehun salaketa hura frogatu, eta euren lanpostuaz larrutik ordaindu zuten.
Egituraz ekoizpen iparamerikar peto-petoa, primeran egina, landua eta burutua, kazetaritzaren epika behin eta berriz goretsiz, egiazko informazioa aldarrikatuz, baina, betiko baina, astindu beharreko presio politiko eta ekonomikoak lar nabarmendu gabe. Gauzak... neurriz gero, ikuskizuna ikuskizun baita!
Edozein modutan, informazio-ikerketaren gainetik eta hari nagusiaren azpitik, filmak azken hirurogei urteotan albistegietan izan diren hainbat aldaketa sakon gogorarazten ditu pasadizoan, mendebaldeko kazetaritzak jasan izan dituen gorabeheren berri tarteka-marteka emanez. Alegia, ordutegi-aldaketa, informazio-audientziaren gainbehera, fikzioaren garaipena, albistegien diru-sarrerarik eza, aurrekontu-murrizketa, egunkarien galera, albiste-erroen ahazmena iritzi-miritzi arolen mesedetan etab.
Egiaren hegiak...
Maria Mapes ekoizlea (Cate Blanchett) eta Dan Rather aurkezlea (Robert Redford)