Amatiño

Ea behingoz gizarteratzen diren

Amatiño 2018/04/17 09:00

Proportzionaltasun bila, nik pare bat hilabetez sartuko nituzke, baina ez kartzelan, guardia zibilen kuarteletan baizik. Eta ez egonean egoteko, oheak egin, platerak garbitu eta erratza pasatzeko baino ez. Ea behingoz gizarteratzen diren.

Orain urte t´erdi, goizaldeko ordu txikietan, hainbat gazte Altsasuko taberna batean sartu eta berriketan ari ziren bi bikote mehatxatu eta astindu zituzten. Erasotuak guardia zibilak ziren, euren andregaiekin, eta erasotzaileak, berriz, herriko seme-alabak.

Erasoa terrorismotzat jota, kasua Madrilgo Entzutegi Nazionalera pasatu zen. Atzo hasi zen auzia, non epaituak izango diren zortzi gazte, zeinetatik hiru, bidegabeki, kartzelan egon diren azken urte t’erdi honetan. Batez beste, Fiskaliak 62 eta 12 urte bitarteko kartzela-zigorra eskatzen die. Gazteon gurasoek ozenki adierazi dute euren seme-alabak ez direla terroristak eta defentsak eskatu du justizia eta proportzionaltasuna.

Nik neuk zinez uste dut, tabernan berriketan zihardutenak Altsasuko seme-alabak izan balira eta erasotzaile-taldea, berriz, kanpotarra, ez genukeela inondik ere gertatua onartuko eta kristorenak esango genituzkeela. Beraz, kasu honetan ere, berdin.

Segurutik arrazoi dute Baltasar Garzon eta Joaquin Gimenez bezalako magistratuek, gertatua terrorismotzat jotzea astakeria dela diotenean; baina arrazoi zuen Txema Monterok ere, idatzi zuenean, jokabide hauek uxatu beharreko ekimenak direla, beste garai bateko jarrerak, behingoz gainditu beharreko jokamolde onartezinak.

Aukeran dator, Altsasuko gazteentzat justizia aldarrikatzea; baina ez letorke soberan gogoratzea, ez dela justua inor erasotzea.

Ez. Herriko jaietan inor mehatxatzea eta astintzea ez da, behar bada, terrorismoa, baina bai matonismo politikoa, eta euren sokakoek aitortu beharko lukete bakebidea, besteak beste, jendea bakean uztea dela, lagunak izan ala ez, iritzi berekoak izan ala ez, gustatu ala ez.

Ez zait iruditzen Altsasuko gazte horiek berrogeitaka urteko kartzela-zigorra merezi dutenik. Ez berrogei, ez hogei, ez hamar... ezta urtebete ere.

Zorioneko proportzionaltasunaren bila, nik pare bat hilabetez sartuko nituzke, baina ez kartzelan, guardia zibilen kuarteletan baizik. Eta ez egonean egoteko, oheak egin, platerak garbitu eta erratza pasatzeko baino ez. Ea behingoz gizarteratzen diren.

EUSKADI IRRATIA - Albiste faktoria

Amaia Agirre dio:

2018/04/17 15:59

Galderatxo bat, zein koartelera bidaliko zenituzke argitzerik bai? Lasa ta Zabala egon zirena? Martxelo Otamendi egondakoa? Aukeratu mesedez milaka euskaldun torturatu izan diren guardia zibilen kuarteletatik gustokoena duzuna eta zehaztu zure idazkan. Esker aunitz.

Pardeluts dio:

2018/04/17 17:21

Proportzionaltasun hori aplikatuz, onartuko duzu Iñigo Cabacas hil zuen ertzainak bizi osorako Iñigoren familiaren morroia izan beharko lukeela, ezta?

Joseba Barandiaran dio:

2018/04/17 19:39

Nik ez ditut gazte horiek ezagutzen, ez dakit zehatz zer gertatu zen egun hortan, baina argi dut eurekin egiten ari direna astakeria galanta dela. Eta eurek errudun izan zein ez, euskal herritarrak izateagatik gertatu zaiela itzelezko mendeku juridiko-polizial hori. Baina zuk "matonismo politikoa" praktikatzearen errudun egin dituzu jada. Bururatu zaizu gutako ia edonor izan zitekela gazte horietako bat, han inguruan trago bat hartzen zebilena, ezer egin gabe? Mikel Zabalzak ez dakin noren antza zuen bezala? Joan Mari Torrealdairi egin ziotena ikusi ondoren, tentu gehixeago ez ote dute gazteok merezi? Berbarako, ikusi duzu Kataluniako Ciutat Morta filma? Gomendatzen dizut. Zure hitzek gazte horien gurasoak mintzeko aukera oso oso handia da, benetan. Uste dut injustua izateko arrisku oso handia hartu duzula hitz horiekin. Zuk jakingo duzu zergatik.

Felix Goñi dio:

2018/04/18 23:36

Giputza izatea beti izan da arras gauza alua. Nafarrok ez zaituztegu behar, hoa zakurraren ipurdira, eta har ezak bakea, eta besteoi ere bakea emaguk.