Datorkigun mundua

“Datorkigun mundua” izan zen atzo Elkargik Kursaalean jarritako puntua, eta Adela Cortina, Cristina Garmendia, Josu Jon Imaz eta Antonio Garrigues Walker adituak-edo, berriz, erantzuteko propio aukeratutako koplariak, 1.300 inguru entzuleren aurrean.

Mundu globala, digitala eta teknologia-garapena; elkar-laguntza eta elkar-harremanak; jarrera, konpromisoa eta berehalakotasuna; berrerabilpena eta mugarik eza; baloreak eta gardentasuna… Hizjario handi samarreko lau lagunek, bi ordutan, gauza asko eta interesgarri plazaratu ahal izan zuten. Ez dut esango gauza berdintsu samarrak adierazteko zorian egon ez zirenik, baina bai, ordea, adierazpen kontrajarri gutxi sumatu zela.

Batere zalantzarik gabe, lauetarik mezurik bertokoena Josu Jon Imazek eskaini zuen. Repsolen kontseilari delegatuaren hitzetan, “datorkigun mundua” ez da inondik ere berria. Urteak eta mendeak dator etortzen eta, adibide gisa baino ez, euskal gizarteak XVIII. mendean gainditu behar izan zituen krisialdiak (burdinolen gainbeherakada Ingalaterrako lehen Labe Garaien aurrean), edo 1939ko hondamendiaren osteko belaunaldiak menderatu behar izan zituen erronkak, ez ziren, behar bada, oraingoak baino errazagoak izan. Eta, edozein modutan, balitez ere, Xabier Muniberen inguruko zalduntxo ilustratuek edo Joxe Mari Kortaren baserri-giroko hazi xumeek indarrean jarri zituzten errezetak berdintsu samarrak izan bide ziren, oraingoan ere, beste behin, baliagarri izan daitezkeenak.

Alegia, nork bere burua ondo prestatu, hizkuntzak ikasi, konplexurik gabe mundura atera, apal eta gozo asko kanpotarrak ekarri, gogotik lanik egin, arriskuak hartu, lehiakorrak izan, beti ere berritu eta, aurrenengoetan ez asmatu izanaz, ez lotsatu. Ekin eta jarrai... eta jarrai... eta...

Josu Jon Imaz, Cristina Garmendia, Antonio Garrigues Walker eta Adela Cortina, atzo Kursaalean.