Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Brujas eta Segura

Brujas eta Segura

Amatiño 2008/09/12 17:32
Bederatzigarren mendean ba omen zen, Flandrian, Brujas* izeneko baserria, Zwin badiako gazteluaren harresipean sortua eta hazia. Mende bat geroxeago, Brujas Flandriaren hiriburua zen eta, Zwin ibaian zehar merkatua gogotik garatu ahala, Europako hiririk aberatsenetakoa bilakatu, Venezia eta Genoarekin batera.

Ingalaterrako burdina, Espainiako ardoa, Errusiako larrua, Danimarkako txerria, Indiako diamanteak zein Ekialde Urruneko espeziak tarteko, historian eta politikan zer gerta ere Hansako Ligaren buruzagi, Brujasek goiari eutsi zion hurrengo berrehun eta berrogeita hamar urteetan eta London bi haina biztanle biltzera iritsi.

Baina, XV. mendean, sekula aurretik gertatu gabea gertatu zen. Handik eta hemendik metatutako lurrez, hondarrez eta jalkinez ibaiaren ur-zingoa murriztu egin zen eta gero eta itsasontzi gehiago Brujaseraino heldu ezinik geratu zen. Ordurarteko merkatua, trafikoa, lanpostuak eta aberastasuna Anberesa pasatu zen eta Brujas maldan behera, nora ezean, zati baterako gelditu: Burges-La Morte, alegia.

Gaur egun Brujas museo-herria da. Eraz eta moldez, XV. mendeko jauntxo herria bailitzan jarraitzen du oraindik ere, bertakoen murriztaile eta turisten gozagarri. Bitartean, Anberesek munduko diamanteen hiriburu izaten jarraitzen du eta, geroztik trena, autoa eta hegazkina asmatu diren arren, bere portuak gau eta egun jarraitzen du etenik gabe lanean.

Aukera-maukeran, Brujasen eta Anberesen jarrera kontrajarrien mezua guztiz esanguratsua da: Goiari eutsi nahi izanez gero, ez munduarekiko loturarik hautsi. Eta batere aldaketarik nahi ez izatekotan, berriz, orduan onena bidea sasiz ixten uztea da. Baina, hori bai, batere aldaketarik gabe aberats izaten jarraitu nahi baduzu, orduan… orduan zeure burua engainatu besterik ez duzu egingo.

Halere, holakorik bertatik bertara ezagutzeko ez dago Brujaseraino joan beharrik. Berbera egin zuten Segurako jauntxoek orain dela 150 urte.

* Sortzez Bryggia, norvegiera zaharrean portua, kaia. Nederlanderaz Brugge da eta frantsesez, Bruges

 Brujas

 Segura

Luistxo
Luistxo dio:
2008/09/15 10:21

Ingelesez Bruges behar du, ahoskatzeko, Brux edo. Aurten ikusi dudan film interesgarrienetakoa In Bruges da. Mafiosoen istorio bat, baina hiriarentzako salmenta turistikoak eragiteko tresna bat ere bai, seguruenik. Erreferentzia asko daude hiriaren arteari, historiari.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Amatiño

Luis Aranberri Mendizabal