Blogak ez omen du albiste garrantzitsutarako balio

Euskarri teknologikoen eztabaida hau baino dezente gorapiltsuagoa da, noski, Kevin Macdonald zuzendariaren thrillerra baina, zer gerta ere, bi ordu luzetan zehar Cal McCaffrey (Russell Crowe) eta Della Frye (Rachel McAdams) zentzu horretako hainbat galdera-ikurri erantzuten saiatzen dira. Cal eskarmentu handiko kazetari tradizionala da (narrasa eta baldar samarra, zikin-usaina dario, txarto jaten du eta garagardo-edalearen tripontzia sumatzen zaio), ofizioaren jabe, iturri sinesgarrietan zein datuen zorroztasunean hazia eta hezia. Rachel, ostera, andana berriko kazetari gaztea,  pizpirina, meharra eta moldetan txukuna, interpretazio sakonetan galtzeke beti gauzak kontatzeko gertu dagoen arren... inork asmatu beharrik gabe ere gauzak gertatu egiten baitira.

Aipatu kazetari tradizionala eta blogari hasiberria ezezik, Cameron Lynne egunkariaren editorea  (Helen Mirren), Stephen Collins  kongresista (Ben Affleck), beronen emaztea, erredaktoreburua, fiskala, polizia eta abar, han-hemenka ikusten ditugun pertsonaiak basoko zuhaitzak besterik ez dira. Basoa, benetako basoa, baso ainubea, korrupzioa da, azpijokoa eta iruzurra, segurtasun publikoa pribatizatzeko egitasmoaren inguruan zenbait politiko eta enpresa garauren azpijana alegia. Eta, barren-barrenean, komunikabide-enpresen iraun beharra, barne-orekak, presioak eta salmentak.

Hala ere, protagonista guztien gainetik eta auzi-mauzi guztien azpitik, filme honek paperezko kazetaritza omendu nahi bide du, iragarki-spot gisako azken sekuentziak lekuko. Baina, esanak esan, omenaldiak zaharrei baino ez zaizkie egiten edota, zaharregiak ez izan arren, hiltzear daudenei.

Ah, eta filmearen barne-mezuari jaramonik egingo badiogu, blogak ez omen du garrantzizko albisterik emateko balio. Ez neri galdetu zergatik. La sombra del poder ikusi eta kitto.

 Helen Mirren, Rachel McAdams eta Russell Crowe