Bidaxuneren argazkia
Garai haien lekuko erdi zutunik dirau oraindik Bidaxunen, alferlanean, agaramontarren gazteluak, Nafarroaren alde eta Gaztelaren aurka borrokatu zirenen gotorlekua.
Agaramontarren gaztelua, juduen hilerritik ikusten denez
Gaztelupean darrai, oraindik ere, ezin bestean, Pirinioetatik Aturri ibairaino malda geldoan behera patxada handiz astiro-astiro doan Biduze errekak. Eta hantxe, oraino, itsasbazterretik berrogeitaka kilometrora, ahateak eta moxalak nagusi diren lehorrean, nafar botereak eraiki zuen harrilanduzko portu miresgarria.
Ibar-portua eta, barren-barrenean, gazteluaren dorrea
Portuko harmailetatik gora, berriz, errepide gainean, juduen hilerria, XVI-XVII mendeetan barrena Iparraldean loratu zen aniztasun eta elkar errespetatu nahiaren gomutaz. Eta hiri-barnean, isilik misilik, Euskal Herrian geratzen diren hiruzpalau sinagogetakoa.
Juduen hilerria
Balirudike historia geratu egin dela Bidaxunen. Ez, gaizki diot. Iruditu ezezik, benetan geratu egin da, unean uneko argazki zaharkitua bezain horixkatua bailitzan.
