Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Bertolt Brecht-en aplikazioak

Amatiño

Bertolt Brecht-en aplikazioak

Amatiño 2008/02/12 07:55
Entzule batek kontu hartu dit, ezker abertzale giroko zenbait alderdi sufritzen ari diren egoeraz ez dudala txintik ere esan. Ea zertan den nere solidaritatea. Hobe nukeela Bertolt Brecht-en poemaz gogoratu...

Alegia: komunisten bila etorri ziren eta komunista ez nintzenez, ez nuen ezer esan. Gero juduen bila eta, judu ez nintzenez, isilik geratu nintzen. Ondoren sindikalisten eta katolikoen bila etorri ziren, baina ez katoliko eta ez sindikalista ez nintzenez... Azkenean nere bila etorri ziren eta, beranduegi, ez zidaten-eta ezer esateko aukerarik ere eman.

Ondo dago Bertolt Brecht aipatzea, baina ez gero ahaztu, berea omen den poema horrek beste hainbat aplikazio ere baduela. Esaterako, lehenik goardia zibila hil zuten; gero, berriz, zinegotzia; baita umeak eta etorkinak ere. Ondoren enpresaria bahitu, hurrenean dendariari iraultza-zerga eskatu... baina ez goardia zibil, ez zinegotzi, ez ume, ez etorkin, ez enpresari, ez dendari... ez nintzenez, ez nuen ezer egin. Atzenean neri tokatu zitzaidan eta, ordurako, berandutxo.

Ondo dago, bai, elkartasuna aipatzea, baina non zinen zu, entzule, zure auzokoari laguna hil ziotenean,  zure kaleko dendariari iraultza-zerga eskatu zitzaionean edo ezer ez zekien funtzionario gizajoa zuloan sartu zutenean?

Ez dakit nik nondik datorren solidaritate hitza. Baina badakit, ordea, zer esangura duen elkartasunak: El-ka-rre-kin, egin beharra. Elkarrekin, zuk eta biok elkarrekin alegia. Baina ez zuk nahi duzuna bakarrik, baita nik nahi dudana ere.

Goiz kronika. Euskadi Irratia, 2008.02.12

   Bertolt Brecht

 

Amatiño
Amatiño dio:
2008/02/13 00:54

Arrazoi duzu. Baina jenderik gehienak --joan zen asteko nere entzulea eta zu zeu atzo arte tarteko-- Brecht-i leporatzen dio eta ez naiz ni minutu t´erdian, hamabost lerrotan, auzia argitzen hasiko. Jatorrizko letra hori denik ere eztabaidagarria da, hainbat bertsio dago-eta. Guzti hori ordea, unean uneko jantzia besterik ez da, azal hutsa alegia. Mamia bestelakoa da, zure ustez erantzuterik ere merezi ez duen hori. Bakoitzak jakingo du zeri ematen dion garrantzia eta zeri ez.

Pedro Izko
Pedro Izko dio:
2008/02/17 12:17

Eskerrik asko Amatiño! Zuzenean entzuteko aukera izan nuen lanera bidean Udana gainean hain zuzen ere. Bada garaia gauzei bere izenez deitzeko, elkarbizitza trikuek bezala ez ulertzeko. ENAMen argudio garrantzitsuena une hauetan independentismoa aukera bezala galerazten ari direla da. Ni independentista naiz, Eusko Alkartasuneko militantea, eta nire buruaren jabe nintzenetik Euskadi euskaldunon aberria dela eta burujabea izateaz gain Munduko beste hainbat nazioen pare aske gure ibilbidea egiteko ahaleginean dihardut. Eta abertzale bezala bizitzeko eta pentsatzeko trabak eta galerazpenak ez dizkidate ez guardi zibilak eta ezta Espainiako juezak jarri (bide batez, gaitzetsi nahiko nuke ANV eta EHAKren ilegalizazioa), bai ordea mutikotatik (ziurrenik aita EAJko zinegotzia zelako orduan) ezker abertzaleko buruek, ikastolatik Lizeora salto egindakoan Ikasle Abertzaleen baitako kideek, eta gauza bera Unibertsitatean ere. ENAMeko "jendarteak" abertzale eta independentista izatea debekatu egin du, zer esanik ez beste hautu politiko bat egin duen jendearekiko hartutako jarrera ... kokoteondoko tiroaren aurrean beste aldera begiratuz ... eta orain elkartasun eske?

aitziber
aitziber dio:
2008/02/12 22:01

Arratsalde on, Zure artikuluarekin batere ados ez banago ere, puntualizazio bat egin nahiko nuke, olerki edo idazki hori ez da Berthold Brecht-ena, Martin Niemoller apaiz protestantearena baizik. Begiratu Wikipedia castellanoz eta han jartzen du. Nik ere horrela uste nuen baina atzo ikusi nuen. Artikuluari erantzuterik ez du merezi.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna: