Bertan behera geratu

Bitartean, itxuraz behintzat, badirudi albistea ontzat hartu behar dugula eta, zintzoak izango bagara, esker oneko azaldu gainera. Hala ere, ez nuke lar xuhur edo zeken samar agertu gura baina, niri behintzat, sekulako ikara ematen dit jakin izanak bart iluntze arte harako iraultza zerga ordaintzeko exijentzia ez zela "bertan behera geratua”. Alegia, makinaria indarrean zela eta sistemari zegozkion ondorioak “gertatu zitezkeela”.

Zer gerta ere, niri ikara ematen dit frogatu ahalak iraultza zerga “bertan behera geratu” izate horretan ez dagoela erantzukizunik txikerrena ere, eta nazioaren izenean hainbat familiatan eragindako triskantzak “gertatu egin zirela”, aurretik harako “exijentzia bertan behera geratu” ez zelako.

Inork esango al digu zer gehiago falta den bertan behera geratzeko?

Joxe Mari Kortak ez ordaintzeko esan zien enpresari gipuzkoarrei. Bertan-behera-geratzaileek ez zioten ADEGIren  lehendakariari irizpiderik onartu, ezta barkatu ere. Pim-pam-pum eta, lantegi atarian, bertan behera geratu zen.