Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Balizko errotak urik ez

Balizko errotak urik ez

Amatiño 2008/03/09 21:29
Emaitzak emaitzak dira, ez gehiago eta ez gutxiago. Gainerako guztiak aitzakiak, esne-berbak eta hutsaren hurrengoak besterik ez dira gaur goizean. Azken hilabeteotan sarri erabili ohi diren balizko arrazoiek ezer gutxi balio dute orain.

Harrigarri da gero zein erraz erabili izaten diren zenbait unetan balizko aditzak. Sozialistek amore emango balute... eskuin espainiarra europarra balitz... alderdi guztiak legeztatuko balira... abertzaleek bat egingo balute... Madrilek elkarrizketarik onartuko balu edo ez balu... ETAk armak utziko balitu... Batasunak muzin egingo balio... etab. Ez dut nik esango politikan den-denak zehatz-mehatza izan beharko lukeenik, baina nekez pentsa dezakegu balizko baldintzetan ezer funtsezkorik eraiki daitekeenik.

Errealitateak interpretazio ezberdinak sortarazten baldin baditu, zer esanik ez elukubrazio hutsak. Zail bada jakineko datuetan oinarritutako eztabaida eta elkarrizketa, zer ez ote den izango balizko esamesak erabiliez gero.  Balizko errotak urik ez dio esaerak, urik ez alegia. Ez ur zaharrik eta are guxiago berririk.

Ur zaharrei bagagozkie, ez du orain ezertarako balio “bi alderdi espainiarren polarizazioa gertatu izan ez balitz“ salatzeak, honez gero batere balio ez duen bezalaxe “indarkeria 1976an amaitu izan balitz” amesteak edo “zor (omen) zaigun lurraldetasuna onartuko baligute“ aldarrikatzeak.

Ur berriei dagokienez, berriz, egia da iraganak etorkizuna baldintzatzen duela. Baina, kontuz, etorkizuna benetan baldintzatzen duena ez da balizko iragana, egiazko iragana baizik. Benetan gertatu zena –eta dena-- alegia, eta ez, gerta zedin, nahi izango genukeena.

 Deia, 2008ko otsailaren 10ean.

 

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna: