Baldintza berdinetan, kanpotarra hobe
Inoiz aipatu izan dut nik hemen Ega Master industria familiar honen nondik norakoa, ez baita inondik ere arrunta. Jaso beharreko sari guztiak jaso ditu kalitateaz, bikaintasunaz, berrikuntzaz, lehiakortasunaz, esportazioaz zein nazioarteratzeaz. Baita, iaz, gazte jendearen lehen lanpostua suspertzeaz ere. Oraingoan, berriz, esan bezala, Human Saria pertsonengan oinarritutako nazioarteko estrategiagatik.
Llabur-llabur bilduz, hiru dira enpresa honek indarrean jarri dituen barne-estrategiak. Lehenik, sekula aurretik lanik egin gabeko gazte jendea unibertsitatez unibertsitate eta eskolarik eskola aukeratzen saiatu. Ez dute aurreko esperientziadun eta eskarmentu handiko heldurik nahi. Eta, baldintza eta prestakuntza beretsuetan, nahiago dute kanpotarra --beste kultura eta hizkuntzaren batekoa-- bertakoa baino. Ondoren enpresaren eta gazte hasiberrien interesak, gurariak eta etorkizun-espektatibak gurutzatu, parekatu eta ildo beretik elkartu. Azkenik, etengabeko barne trebakuntza-sistema iraunkorra abian jarri.
Guzti honen ondorioz, gaur egun Ega Masterren langilegoari darion egitura honako hau da. Ehun eta bi beharginon %21 kanpotarrak dira eta guztira hamazazpi hizkuntza dakizkite, hamahiru europar gehi arabiarra, japoniarra, txinatarra eta twi delakoa. Batez beste 30 urte inguru dituzte, emakumeak %60 dira guztira eta zertxobait gehiago kargudunen artean. Hain zuzen, zuzendari eta kargudunen artean %88k enpresan bertan ekin zioten estreinako lanari eta urtez urte, mailaz maila, joan dira ardura berriez jabetzen.
Zenbait zuriunetan ezik, Ega Masterren erremintak erabat sakabanatuak mundu guztian zehar