Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Baikorrak eta ezkorrak

Baikorrak eta ezkorrak

Amatiño 2014/08/25 00:05
Mendizale nafarra hil zen larunbat eguerdian, Panticosan, Garmo Beltza gailurraren eta Pondiellos orratzaren artean maldan behera 50 metroz amildu ostean. Ordu eta inguru berean, Canfranc-eko “Los Arañones” taldekideak igotzen ari ziren Infernuko gailurretara eta erreskate-helikopteroa bertatik bertara ikusi.

Canfranc-eko “Los Arañones” mendi-elkarteak Infernuko gailurrak (3.082 m.) zituen helburutzat azken asteburu honetako mendialdi-programaren baitan. Hala ere, hiru milako tontorra zailegia edo luzeegia izan zitekeelakoan zenbaitentzat, bigarren mailako beste aukera bat proposatu zitzaigun (iboi Urdinak), hainbat horma eta zirrikitu aldapatsu bezain estutan barrena pasatzeko beldur samar izan gintezkeenontzat.

Honelako eztabaidetan beti elkartu ohi dira baikorrak eta ezkorrak. Baikorrak dirateke sekula zailtasunik ikusi ez ezik, animatze aldera-edo esaten dizutenak: “kontuz ibiliez gero ez dago arazorik. Nik badakit nola zabiltzan zu mendian eta benetan diotsut gauza zarela goraino igotzeko”.

Eta ezkorrak, berriz: “begira, ez dakit zu baina, ni behintzat, ez naiz mendira sufritzera etortzen eta ez dut uste larri-larri ibili beharrik dagoenik. Zuk nahi duzuna egin ezazu baina nik, aukeran, nahiago dut erdi bidean geratu eta, gailurreraino doazenak itzultzen diren bitartean, ogibitartekoa jan, argazkiak atera edo iboian hankak freskatzen jarri”. Gero norberak erabakitzen du, jakina.

Auskalo mendizale nafarra baikorretakoa ala ezkorretakoa ote zen, baina ez du gehiago ez ogitartekorik jango, ez argazkirik aterako, ez oinak Panticosako iboi Urdinetan freskatzen jarriko. Berrogeita hiru urte zituen. Goian bego.

Mapa

Garmo Beltza, Pondiello iboiak, Infernu gailurra, iboi Urdinak, Tebarrai iboia... guztia ingurune berean. Euskal Herritik hurbilen dauden hiru milakoak. Ondoko argazkiak larunbat goizekoak dira.

Garmo Beltza

Infernuko gailurrak (3.082 m.) eta, barrenean, Garmo Beltza (3.051 m.)

Iboi urdinak

Pondiellos iboiak

Tebarray

Tebarrai iboia

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Amatiño

Luis Aranberri Mendizabal