Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Aukeran, hobe Felipe Hollande baino

Aukeran, hobe Felipe Hollande baino

Amatiño 2014/06/04 00:05
Segurutik monarkia ez da sistemarik aukerakoena, modernoena edo etorkizunik gehien duena baina… ez dakit ba nik Iparraldeko anai-arrebei horren ondo joan ote zaien zorioneko frantziar errepublika antologikoarekin. Nik, aukeran, nahiago Felipe Hollande baino.

Ni amerikarra banintz ez nuke sekula erregetzarik aldarrikatuko. Baina ezta aldaketarik eskatuko ere danimarkarra, norvegiarra edo suediarra banintz. Irudi ere, ez zait iruditzen eskoziar eta flandiarrei eragozpen handirik egin dienik errege-sistemak, heldu diren heldulekura heltzeko.

Bai, Espainia errepublika balitz, bere presidentea ere, lehen ministroaz gainera, espaniar alderdi politiko handiren bateko kidea izango litzateke. Bat ez ote nahiko? Zertarako bi? Nik, aukeran, nahiago bietako bat ezein alderdikoa, trukean odol-urdina izan behar baldin badu ere.

Bai, bistakoa da nire iritzia ez dagoela batera joeran. Bost axola. Esanak esan, eta zer gerta ere, nik, aukeran, nahiago Felipe Hollande baino.

jaime
jaime dio:
2014/06/04 16:59
Izan ere, gure Iparraldeko anaiek ez zuten esperientzia goxorik izan Frantziako monarkiaren desagerpenarekin. Iraultzaren oinarrien izenean: Liberté, Egalité et Fraternité (Askatasuna, Berdintasuna eta Anaitasuna), Azkaine eta Sarako biztanle guzti-guztiek Frantziako beste lekutarako deportazio kriminala sufritu behar izan zuten beren izate eta fedeari uko ez egiteagatik. Iraultzak ezabatu zituen herrien euskal izenak ere. To eta no! Liberté eta abar!
Harrezkero, Frantziako gobernuak ez du inoiz industri handirik kokatzea onartu iparraldeko hiru lurraldeetan. Paris, Bordeaux, Lyon edo beste hiri handitako udatiarrak erreserba berde bat topatu du beti Iparreko Euskal Herrian bere “bakantzak” emateko edo bere bigarren etxea edukitzeko.
Horrela lortu da, pixkanaka-pixkanaka, euskara desager dadila eta euskaldun asko, baserri eta lurrak salduta, Ameriketara edo Frantziako beste herritarako behin betirako deserritzera bultzaraztea.
Mutil gazte nintzenean, Xiberutik Parisera – opila egiterat – joaten ziren neskei buruz hitz egiten zenean betiko topikoa erabiltzen zen “hau neskame edo puta bukatuko duk”. Frantzia demokratiko hartan ez zegoen ardura handirik euskaldunekiko. Eta gaur ere...
Zenbat aldiz ez ote dugun bada irakurri Lapurdiko udaldi-lekuetan: “Parlez propre, parlez français” Mintza zaitezte garbi, mintza zaitezte frantsesez.
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Amatiño

Luis Aranberri Mendizabal