Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Astoa ikusi nuen

Astoa ikusi nuen

Amatiño 2019/08/08 13:30
Soraluzetik Eskoriatzarainoko bidegorrian bada, oraindik, baserriren bat non, barrena, hamabiren bat asto elkarrekin bizi diren lasai asko. Badakit google-mapaz nabarmen zehatzagoa izan nindekeena baina, tira, laga ditzagun astook bake santuan.

Nik umetan entzun nuen lehen ipuinetako batek zioenez, Jainkoak mundua sortu zuenean, zereginetako bat izan omen zen gauzei izena jartzea. Hartara, animalia guztiak bildu zituen behin, banan-banan izena ipintzeko. Alegia, txakurrari, txakur; katuari, katu; oiloari, oilo; otsoari, otso; lehoiari, lehoi eta, abarri, eta abar.

Biharamunean Jainkoak deitu zituen berriro bezperan izendatutako animaliak, bakoitza bere izenaz gogoratzen ote zen jakiteko. Antza, denek gogoan zuten izena, astoak izan ezik. Eta, orduan, Jainkoak esan zion: “Izena astu dozunez, hemendik aurrera astua izango zara”.

Ez dakit nik egungo gizarte eskolatu honetan ipuin horrek zentzurik ote duen, baina nik bi ondorio nabarmen atera nituen. Bat, astoa mundua bera bezain zaharra zela; eta, bi, astoa animaliarik mozoloena zela. Orain badakigu biak direla gezur hutsak, baina, ikasi dugunerako astorik gabe geratu gara, betaurrekoak, txapela edo gabardina jantzi arren.

Gure belaunaldikook astoz inguraturik hazi ginen, baserri-giroan zein kale-bazterrean. Ez dut esango txakurra bezain arrunta zenik, baina bai behintzat, begi-bistan, katua baino ugariagoa. Gaur egun, ostera, benetan ezustekoa da astoren batekin topo egitea. Inork ez omen du astorik nahi, ez duelako, nonbait, ezertarako balio. Eta, jakina, gizarte praktiko honetan, funtziorik ezean, ezin ba luze iraun.

Hala ere, Soraluzetik Eskoriatzarainoko bidegorrian (26 km.) bada, oraindik, baserria non, barrena, hamabiren bat asto elkarrekin bizi diren lasai asko. Badakit google-mapaz edo dezente zehatzagoa izan nindekeena baina, tira, laga ditzagun astook bake santuan.

Astoak

Astoak, bidegorri ondoan, atzo

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Amatiño

Luis Aranberri Mendizabal