Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / "Argindartegi" berriak, abian

"Argindartegi" berriak, abian

Amatiño 2010/10/14 23:26
Hamar urte barru Euskal Autonomia Erkidegoan matrikulatuko diren hamar auto berrietatik bat argindarrez arituko da eta 40.000 argi-hornigailu inguru sakabanatuko dira han-hemenka, kalez kale, aparkaleku publikoetan zein saltoki-guneetan. Repsolek eta Energiaren Euskal Erakundeak "Ibil" sortu dute eta auto elektrikoaren iraultza abian da.

Segurutik “iraultza” hitz potoloa da baina ez naiz ezer asmatzen ari, azken hogeita hamar urteotan gas-hornikuntzaren inguruan gertatutakoa berriro  ezagutuko ote dugun itxaropenetan baizik. Gogoratu dezagun 1982an Eusko Jaurlaritzak EVE-EEE (Energiaren Euskal Erakundea) sortu zuela eta azken hiru hamarkada honetako energia-estrategiaren oinarriak martxan jarri.

Ekimen pribaturik ezean kapital publikoak etorri behar izan zuen herriz herri gas-hodia zabaldu eta etxerik etxe zerbitzua eskaini ahal izateko. Hogei urte geroago (2003) Jaurlaritzak gas-ondarearen %65 saldu zuen 537 milioiren truke eta aurten, berriz, %25 saldu du 532 milioitan. Hau da, hogeita hamar urteren bueltan sekulako sarea barreiatu, hiritarrei zerbitzua eskaini eta mila milioitik gora bildu.

Auskalo zer gertatuko ote den hurrengo urteetan baina, gasaren eredu beretik gertatzen baldin bada, 2.040  urtean ibilgailu elektrikoa erabat arrunta izango da, Eusko Jaurlaritzak bere partea (%50) saldu ahal izango du eta inbertsio guztia berreskuratu ezezik, baita etekina lortu ere Herri Ogasunaren mesedetan.

EvolucionVE_cuadro_eusk

Orain hogeita hamar urte ez bezala, Eusko Jaurlaritzak hasiera-hasierako inbertsioan parte hartzeko gertu dagoen kapital pribatuaren laguntza aurkitu du, egungo Euskal Autonomia Erkidegoa 1982koa baino sinesgarriagoa delako ziurrenik, gasaren esperientzia onuragarria izan delako eta enpresa pribatuen arteko lehia orduan baino zorrotzagoa delako.

tipo-instala_eusk

Eusko Jaurlaritzak ez dauka ez argindarrik, ez gasolindegi-sarerik. Horretara, teoriaz, barrena aukera bi zituen. Batetik, argindar konpainiaren batekin hitzartu eta “argindartegi” (gasolindegi elektrikoak) berriak jarri. Edo, bestetik, aldez aurretik sarea duen petrolio-konpainiaren batekin adostu eta argindarra merkatuan erosi. Bistan denez, Energiaren Euskal Erakundeak bigarren bide honetatik jo du. Hogeita hamar urte barru hitzegingo dugu.

 Ibil

Josu Jon Imaz eta Jose Ignacio Hormaetxe, Repsol Energia Berriak eta EEEren zuzendariak, "Ibil" sortzegunean

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Amatiño

Luis Aranberri Mendizabal