Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Amatiño / Andoni Areizaga, nagusirik onena

Andoni Areizaga, nagusirik onena

Amatiño 2012/05/10 23:00
Minbiziak jota hil da Andoni Areizaga, ETB estreinako antenaratzeko orduan Euskal Irrati Telebista erakundearen zuzendari nagusia zena. Andonik ezer gutxi zekien komunikabideez, 1982ko azaroan, irrati-telebistaren lemaz arduratu zenean; eta 1985an zuzendaritza utzi zuenetik aurrera ere, ez zuen gehiago sektorean lanik egin. Baina hilabete eman zioten Urteberri-egunean Euskal Telebista plazaratzeko eta egin egin zuen.

Bertatik bertara, EiTBren bost zuzendari nagusi ezagutzeko aukera izan nuen nik 1982tik 1999ra bitartean: Josu Zubiaur (1982), Andoni Areizaga (1982-1985), Jose Mari Gorordo (1985-1987), Josu Ortuondo (1987-1991) eta Iñaki Zarraoa (1991-1999); eta, inor gutxiesteke, zilegi bekit esatea Andoni izan zela, ene irudiko, denetarik nagusirik onena.

Andoni gizon-puska ona zen eta profesional zintzoa bezain zuzena, zorrotza izan beharrik gabe.  Entzuten zekien, jokoa ematen eta lankidetza areagotzen. Buruzagitzari muzin egin gabe hierarkia horizontaletan sinesten zuen gizona, berak dena ezin zuela egin ondotxo zekien nagusia eta funtzio-banaketaren kudeatzaile sutsua.

Andoni Areizagak egoera, gertakari eta abagune zailak bizi behar izan zituen EITBren zuzendari jardun zuen hiru urteetan. Ez naiz ni inondik ere Euskadi Irratiaz hitzegiteko aukerakoena baina, Euskal Telebistaren baitan behintzat, berari egokitu zitzaizkion lehen emanaldiko zertzelada eta ipi-apa guztiak bat etorraraztea, sekula telebistarik egin gabeko lagun-taldea lanean jartzea, oraindik ere indarrean dirauten oinarrizko ereduak balioztatzea, zenbait interes korporatibok eragindako lanuzte lotsagarriei aurre egitea eta EAJren zatiketa erakarri zuen Garaikoetxearen afera herri-telebistaren leihotik kudeatzea.

Andoni Areizaga, kristaua eta abertzalea, jakituna bezain apala, solaskide naroa eta sakona, erakunde-gizona eta alderdi-gizona izan genuen baina, zer gerta ere, gauza guztien gainetik, lehenik eta behin, Euskal Irrati-Telebistaren defenditzaile amorratua eta bere lankideen artzain ona.

Besteak beste, Andoni Areizaga erabateko gizon eskuzabala eta maitekorra izan zen azken uneraino. Hilabete inguru baino ez da zineman aurkitu nuela: 78 urte, minbiziak jota eta, areto-barruan, nire egoeraz eta familiaz arduratuta. Bapo Andoni. Jaioko dira bai berriak, baina kostatuko zaie zure goiari eustea.

Jaso nazazu maitea, azken egunean,
zatoz nere bidera eta adeitsu, irriz, dei nazazu nere izenez,
ni ere erruki handian salbatua izan nadin,
salbatuak elkarrekin eta maitasunean glorifikatuak betirako.

(Xabier Leteren otoitza, Andonik sarri errezatu ohi zuena)

AREIZAGA

Heinrich C. Möller (Studio Hamburg-en aholkulari nagusia, alemana), Eugenio Iriondo (ETBren lehen Teknika zuzendaria, ondarrutarra), Herbie Eisner (Studio Hamburg-en ekoizpen eta teknika aholkularia, austriarra) eta Andoni Areizaga (EITBren zuzendari nagusia, donostiarra). Hanburgo, 1982

inazio arregi
inazio arregi dio:
2012/05/22 02:31

Irakurri berri dut Areizagari buruz idatzi duzuna. Zurekin ados nago. Benetan horrelako aipu bat merezi zuen Andoni Areizagak. EITB' ko zuzendari izan zenean, izan zituen bere korapilloak, eta ez txikiak. Baiño lan handia egin zuen, beti zuzen jokatu zuen, eta asko ahalegindu zen EITB' ko irratia eta telebista martxan jartzen.Azken illabete hauetan, berarekin izan ditut hitz aspertu batzu eta beti arrituta utzi ninduen ikusirik nola jasan zuen bere sendatu eziñeko gaixotasuna, eta nola prestatu zen eriotz ordurako. Zure eta nere lagun batek idatzi didan bezala "era un gran señor". Bere kristau sinismena oso gaurkoa, egiazkoa zen. Beti denetarik ikasten ari zen. Zorionak zuri eman duzun iritzi horregatik.

izena
izena dio:
2012/07/06 12:11
Es interesante cómo el tiempo endulza los recuerdos. Sería interesante escuchar la opinión del Subdirector Financiero al que se cesó bajo su mandato, también hombre creyente, trabajador honrado, buen gestor y director de equipos, querido por sus compañeros. Pero nosotros no podremos escuchar esa opinión, porque el corazón de ese hombre no tuvo fuerza para seguir latiendo mucho más de un año tras su cese profesional, y se paró definitivamente cuando era un joven de 46 años.
Si de verdad hay algo después de esta vida, ahora se habrán encontrado de nuevo. 25 años después.
Amatiño
Amatiño dio:
2012/07/07 16:48
Uste dut gogoan dudala nor izan zen EiTBren Finantza Zuendaria 1983tik 1986ra bitartean, ezin gogoratu, ostera, zuzendariordea. Kontu izan, garai hartan EiTB administrazio-erakundearen eta Euskal Telebista zein Eusko Irratia komunikabideen arteko tartea oraingoa baino nabarmen handiagoa zela. Garai hartan ETB eta EI enpresek batere lotsarik gabe aldarrikatzen genuen gu ez ginela EITB. Geroztik ordea, urtez urte, EITB erakundea nagusitzen joan da, nire ustez, Euskal Telebistaren eta Eusko Irratiaren autonomiaren kaltetan.
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Amatiño

Luis Aranberri Mendizabal