Allende, Aldama eta Abasolo
Liburuaren azala
Inma Roiz, kazetariaz gainera, Antropologiaz lizentziatua da eta migraziotan aditua. Euskal Herrian nahiz Mexikon XVIII. mendeko hainbat datu arakatu eta bildu ostean nolabaiteko nobela kostunbrista burutu du, non funtsezko historia- eta bibliografia-datuak benetakoak diren eta gertakariei darien kontakizunik gehienak, ostera, fikzio hutsa.
Aiarako zein Enkarterrietako semeak joan ziren joan Ameriketara, Nueva Españara, bertoko egin eta euren ondorengoak buru belarri altxatu ziren Espainia zaharraren aurka eta Mexiko berriaren alde. Hemen geratu ziren, berriz, Manuela bezalako arrebak, etorkizun handirik gabeko ohitura eta bizimoduetan nola hala iraun gurarik
Naizen honek nahiago, aukeran, historia hartaz 74 orrialdeko kronika 574ko nobela baino, baina… Liburua lagunaren aholkuz irakurri dut. Haatik, harek baditu nik sekula izango ez ditudan hiru dohain: emakume izatea, Mexikon bertan jaioa eta Aiarako biztanlea. Izan ere, nobela aproposa segurutik Guanajuato, Okondo, Querétaro edo Gordexola bere baitan txirikordatzeko gauza den irakurlearentzat baina, ez dakit ba, zein neurritan, gainerakoentzat…