Aintza Atano III.ari, baina ez Gallastegiren kaltetan
Gallastegi nagusitxoa da honezkero eta ez du inoren laguntzarik behar bere burua defenditzeko, baina nire aldetik dozena erdi xehetasun baino ez:
1. Nik esan beharrekoa neure blogean idatzi nuen, euskaraz; ez DVn, gaztelaniaz. Makinatxo bat dira hurreratu zaizkidanak galdezka: “¿Qué has escrito tú en tu blog en contra de Atano III?”
2. Nik blogean idatzi dudana zera da, hitzez hitz: “Atano III.ak eta Gallastegik lau bider jokatu zuten buruz buru, eta lauetan eibartarrak irabazi. Lauetarik bat baino ez gogoratu izana da, behar bada, Atanoren mesedetan eta Gallastegiren kaltetan, euskal pilotaren historian egin den iruzurrik handienetakoa".
3. Juan Mari Juaristik besterik frogatzen ez duen artean kontua zera da: ofizialtzat eta jakinekotzat jotzen den informazioaren arabera, Gallastegik behin baino ez ziola irabazi Atano handiari, 1948an, azkoitiar “zaharrak” ordurako 44 urte zituelarik. Baina, benetan, Gallastegik lau aldiz irabazi zion, aurrena 1942an eta azkena sei urte geroago.
4. Egia da aurrenengo hiruak ez zirela txapelketa ofizialekoak izan. Baina egia ere bada, ez zirela afariketako edo lagunarteko partidak izan, biek elkarri egindako desafio eta erronka zorrotzez baino.
5. Informazio honek ez du nahi izan Atano handia gutxietsi, Gallastegiri ukatu zaizkionak eta zor zaizkionak aitortu baizik.
6. Ez daude zalantzan Atano txapeldunaren ahalak, hainbat atanozaleren jarrera ahazkorrak eta gogoratu nahi ezak baino.
Aintza eta ohore Atano III.ari, baina ez gero Gallastegiren kaltetan.
DV, 2013.12.09
Gallastegi eta Atano III.
