EibarOrg elkartearen bazkaria Gorlan

Zerrendakideontzat kronika laburra: egun ederra pasatu genuen atzo, zapatuan, Bergara aldean, Elena Lakak antolatuta. Han bildu ginen zerrenda honetako hainbat kide (batzuk familiaz lagunduta): Mikel Iturri eta emaztea, Oier Gorosabel andrearekin eta bi umeekin, Aintzane senarrarekin eta ume biekin, Elena bera, Leire Txargain, Gari Araolaza, Luistxo, Asier Sarasua Aranberri, Imanoltxu, Iban Arantzabal eta Xabier Mendigreen.

Goizean Bergarako hiriaren edertasun monumental eta historikoak ezagutzeko bisita egin genuen, jon arroita orozkoarrak gidatuta: oso gomendagarria.

Bazkalorduan Gorlako Altzasu soziedadera igo ginen: paraje ikusgarria eta izugarri ondo montatutako elkartea; Elenak berak prestatu zizkigun (Imanoltxuren eta Gariren laguntzarekin) sarrerako gildak, ondoko entsalada eta piper beteak, eta haragi gisatua patatekin. Postretarako, Bergarako relleno eta tostoiak, eta gatzatua.

Kafeen ondoren, munduaren dominaziorako zenbait azalpen teknologiko: Niagarank, umap berritua (datorren astean berriro zuekin), laster datorren telebista saioa...

Elosu aldetik jaitsi ginenerako, gaua; egun atsegin eta probetxuzkoa, dudarik gabe.

Mila esker berriz ere anfitrioiari, gauzak hain ongi eta kariñoz antolatzeagatik, eta beste besarkada bat han bildu ginen guztioi.

Egon ez zinetenoi inbidia apur bat eman badizuet, badakizue zer egin behar duzuen hurrengoan: apuntatu.

• Jatorrizko kronika, Eibartarrak Zerrendan.
• Gorlako argazkiak: Imanol Trebiño. Bergarako talde-argazkia, Goiena.