Harrikadak

Bihar da gaur

Mikel Iturria 2014/12/25 11:06

Azken bolada luze honetan ez dut idazteko gogo handirik. Beharrik bai, baina ez dut tonuarekin asmatzen eta dena esanda dagoela iruditzen zait eta nik ezer gutxi gehitu dezakedala.

Baina gaur goizean Twitter zabaldu eta ikusi dut AEBetako NPR irrati publikoaren 2014 urteko 50 disko onenen zerrenda. Zerrenda bitxia da ez baitago bata bestearen gainetik (alfabetikoa da) eta 1976 urteko disko bat dagoelako tartean: Los Lobos & Friends taldeak eginiko Sí se puede albuma (entzun Spotifyn edo Deezer zerbitzuetan). Eta hemen Youtuben:

Aipamen-testutxoa idatzi duen Félix Contrerasek dio gaur-gaurkoa dela. Eta nik uste dut arrazoia duela.

Albuma César Chávez nekazal liderraren United Farm Workers sindikatuaren kanpaina bat laguntzeko atera zuten. "Como estamos en huelga no se puede comer uva", dio Telingo Lingo kantak. Izan ere hori zen borrokaren arrazoia: mahatsa bilketa egiteko lan baldintzak.

Arroitatarrak

Dena ez da twitter, zorionez. Korreoan ere iristen dira pulamentuzko mezuak. Kasu honetan, Eibartarrak posta zerrendan jarri du Gari Araolazak Arroitajauregi anai-arrebei berriki eginiko bideo bat. Gehienok ezagutuko duzue Maite Arroitajauregi Mursego musikaria, baina ez zaizue hain ezaguna egingo Ander Arroita luthierra.

Eibar herritik dator (beste) notiziya (txar bat)

Codesyntax enpresaren albistegi automatiko española (Niagarank.es) ixtera doaz. Arrazoia Jabego Intelektualaren Lege berriak indarrean jarriko duen izeneko AEDE tasa da. Edo izan daiteke, legeak proiektua aurrera eramateko eragiten duen segurtasun falta nabarmentzen baitute eibartarrek.

Mañana es hoy, este apunte en castellano.