Agur Amorrortu, agur jauna
Lehengoan agur Metak eta gaur agur Amorrortu. Bai, badakit futbolaren elite maila horrelakoa dela eta profesionalek dirutza irabazten dutela, baina Amorrortu kargutik kendu zutela enteratu nintzenean, astelehen eguerdian-edo, pena hartu nuen. Bere garaian Iruretak kluba utzi zuenean bezalaxe (gero, ez ahaztu, urtetik urtera emaitza ezin hobeak lortzeko Galiziako bi klubetan). Norbaitek esango dit Amorrortuk ez duela izango Iruretak izandako bide arrakastatsua. Ez, seguraski ez da horrela izango. Baina dotore aritu da Deustuko gizon umil hau Gipuzkoako talde txuri-urdinean egin duen urte eta erdian.
Hau idazten dudan bitartean Euskadi Irratian entzun dut Realaren informazioa jarraitzen duten kazetariek txalotu egin dutela Jose Mari Amorrortu, agur esateko emandako prentsaurrekoaren ondoren.
Ez da kirol krisia Realak duena. Krisi instituzionala da. Asko aldatu da futbola azken urteetan eta mila faktore izango dira sartzekoak kokteleran: jokalariek ez dutela garai bateko konpromisoa eta kasta, Atotxatik Anoetarako urratsa, zalegoak ez duela lehen bezala bultzatzen eta animatzen, ikuskizun mediatikoa gailendu, kirola bigarren mailan geratzen dela, etab.
Hori eta ez dakigula zer kristo den XXI. mendearen atarian dagoen Reala. Zer demontre gara? Harrobia lantzen duen taldea? Harrobia eta puntako jokalari kanpotarrak dituen taldea? Zergatik ez hitz egin argi eta garbi?
Zer pentsatua eman dit jokalari ohiek bultzaturiko gaur egungo administrazio kontseiluak nola jo duen kanpoko jokalariak fitxatzera gauzak gaizki jarri direnean. Zer ez luke ekarriko Miguel Santos jokalarien ordezkariak?
Zaleek ez dugu batere pazientziarik, ez diogu etxeko jokalariari behar duen denbora ematen. Beti gogoratzen dut Satrustegi mitikoak Lehen Mailan egin zuen lehenengo denboraldian oso makal aritu zela hilabete luzez. Garai hartan, jendea gai zen esateko hau txarra da, baina gutarra da.
Gaur egun, berriz, txistu eta marmarka ari dira asko eta asko etxeko jokalarien kontra. Eta horrela ez dira gauzak konponduko, bideratuko, ni-pa-dios!
Zorte onena opa diot Gonzalo Arconadari bere eginkizun berrian eta ea datorren urtean ere Lehen Mailan aritzeko moduan gauden.
Eta Amorrorturi, esan bezala, agur eta ohore, jauna.
Esandako gauza askorekin erabat ados nago, baina zaletueek ez dugula pazientziarik ez dakit nik... Jokalariek asko kobratzen dute, garai batean ez bezala. Anoetan sufritzen jada denbora dexente daramago, hala ere zaletuak bertara hubiltzen gara; bestalde abonoak igo dituzte, hala ere zaletuak hor gaude. Astiazaranek eta bere lagunek webguneko foroa itxi egin zuten, eta zaletuek hor jarraitzen dugu, Astiazaranek eta bere lagunek transparentzi falta azaldu zuten, horrela jendea errealarekin eta Fuentesekin dago. Diru laguntza eskatu zuten Errealarentzat eta ez da gutxi lagundu duen jendea. Benetan esaten diztu kanpotik akaso badirudiela jendea ez dagoela taldearekin, baina Anoetan bazkide den jendea denboraldi dexente sufritu ditu bere eserlekuan, hala ere, talde bultzatzen saiatu da; horrek ez du esan nahi beste gutxi batzuk taldea kritikatzen egon ez direnik. Ea ilusioa lortzen dugun, Arkonadak dioen moduan.