Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Harrikadak / Javier Ortiz, Bernardo Atxaga eta Montxo Armendariz

Javier Ortiz, Bernardo Atxaga eta Montxo Armendariz

Mikel Iturria 2005/08/31 19:42

Gaur Javier Ortizen eguneko apuntea irakurri dut eta asko gustatu zait (kabroia forman dago) oporren ondorengo sindromearen definizioak: tiempo que tarda una persona medianamente lúcida en resignarse a su destino mediocre y dejarse vencer por los efectos anestésicos de la rutina.

Harrigarria da gizonak duen jarioa: 2000ko uztailaren bukaeran webgunea abiatu zuenetik, egunero idazten du apunteren bat.

Nik ezin dut. Ez dut gauza asko kontatzeko eta, garai honetan, inoiz baino formaz kanpo nago.

Gorputzari nahi duena egiten utzi behar ez zaionez, hasi beharko dut zeozer idazten eta Atxagari buruz egitea erabaki dut.

Atxaga egunak izan ziren abuztuaren 23 eta 24 EHU-UPVk antolatzen dituen Udako Ikastaroetan. Iaz ere egon zen Miramar jauregian eta gero Irunen eskaini zuen hitzaldia arratsalde euritsu batean. Egun hartan Mariasun Landa izan zen aurkezle lanetan aritu zena.

Aurten, abuztuaren 23an, Kutxak Andia kalean duen areto betean irakurketa publikoa egin zuen Bernardok. Gazteleraz, batez ere, aritu zen eta aurkezlea Harkaitz Cano izan zen.

Txorakeri bat da, baina grazia egin zidan harrapatu egin nuela Atxaga. Bere hitzaldian kontatu zuen Uruguayko ez dakit zein tokitan turista gisa paseatzen ari zela eta kalean edadetu batek gelditu zuela. Hasi zen gizona galdezka ea nongoa zen eta euskalduna zela entzundakoan, haren amona euskalduna zela eta honek ume garaian abesten zion Iparraldeko lo-kanta abestu zion aitonak. Iparraldeko kanta ezaguna da, baina nik ez dut izenburua gogoan.

Grazia egin zidan, zeren anekdota hori iaz kontatu zuen Atxagak Irunen. Hala ere, joan den astean ez zen horretaz akordatzen, eta uste zuen lehenengo aldiz kontatzen zuela jendaurrean Euskal Herrian.

Galdera-erantzunen txandan, Enkarni Genuak galdetu zion laster estreinatu behar den Obaba filmeari buruz. Uste dut asteasuarra pozik dagoela Armendarizek egin duen filmearekin. Hori da behintzat publikoki esaten duena.

Ni, behintzat, hasi naiz 1991 urtean EGA ateratzeko ikastaroan oso gustura irakurri nuen liburua berrirakurtzen. Camilo Lizardi erretorea, Albania, maistra, muskerra...

Ea nola azaltzen duen nafar zuzendariak liburu hori pantailan. Donostiako Zinemaldiaren sail ofizialean estreinatuko da filmea eta ez da oso aztia izan behar irabazteko hautagai nagusia dela jakiteko.

Hona hemen apustua: baietz irabazi Obabak Urrezko Maskorra?

etiketak:
eneko
eneko dio:
2005/09/01 13:21

Aupa Mikel,

Javier Ortiz-en esaldia hemen irakurri eta Udako ikastaro baterako idatzi dudan En el 2030..., y ¿trabajando? saiakeran erabili dut. Justu idatzia bidali aurretik ikusi nuen, gustatu zitzaidan eta erabiltzea erabaki nuen. Idatziaren amaieran dago, mila esker.

Mathiasen kopilotua
Mathiasen kopilotua dio:
2005/09/01 19:15

Aupa Mikel,

Ez dakit ba Obabak Urrezko Maskorra irabaziko duen, baina sariren bat fijo... Zinemaldiak tratu ona eskaini izan dio beti Armendarizi, batez ere Las cartas de Alou saritu zutenean... Urte hartan Cohen anaien Muerte entre las flores filmari ez zion epaimahaiak arreta gehiegi eskaini. Uste dut moskeo ona hartu zutela Cohendarrek... Ez dira berriro etorri... Snif!

Ah, eta zuk jarritako Armendarizen loturan ez da (nire ustez) bere pelikularik onena azaltzen: Secretos del corazon. Zein ona den pelikula hori!

Ondo segi.

Iturri
Iturri dio:
2005/09/03 19:54

Kaixo:

Ondarretako hondartzan egon naiz eguerdian. Kanpoan bazkaldu eta orain erantzunen bat idatzi nahi nuen, baina alpertuta nago.

Ez dakit oporren ondorena den edo beroa. Auskalo.

Dena den, eskerrik asko mezuengatik.

Iturri
Iturri dio:
2005/09/25 21:18

Igarle lanetan, 0 patatero. Ez dut asmatu. Ez diote sari mixerable bat eman Obaba pelikulari.

markos zapiain
markos zapiain dio:
2005/09/02 02:49

Cohen anaiak niri ere izugarriak iruditzen zaizkit, batez ere "The big Lebowsky". Asko gustatuko litzaidake baten batek The Dude-ren antza dudala esatea. "Arizona baby", "Fargo", "The Ladykillers"... jenialak. Nire ustez, "Muerte entre las flores" ahulena. Umorea falta zitzaion edo nik ez nuen atzematen jakin edo bikoizketan galdu zuen.

Atxagaren beste hitzaldietan izan nintzen ni, Iturri. Euskaraz esan zituen, bi egunetan.

Lehenbizikoan kontatu zigun Obabakoak-eko Gautier-en aipamena kontraplajio bat dela. Atxaga eulitu egin zuen Gautier-en aipamen batek: Tolosako azokan zebiltzanek "un aspecto singular y salvaje" omen zeukaten.

Asmatutako Madame bati Gautier-ek idatziriko gutun bat asmatu zuen mendeku ttiki gisa Atxagak, godalet dantza deskribatzen duena, "Azken hitzaren bila"n. Frantzian oraindik inor ez da ohartu, are gutxiago beste inon.

Biharamunean, distantziak ematen duen askatasuna aipatu zuen. Bilboko bere lagun baten alabak ipuin bat erakutsi zion: hamairugarren mendeko Bilboren gainetik helikoptero bat zebilen. Orduan Atxagak seinalatu zion, editore espainolen hizkera erabiliz, bazela han "algo que chirría". Neskak berehala zuzendu zuen ipuina: hamairugarren mendeko Londresen gainetik zebilen helikopteroa. Atxagak berriro...

Behin betiko bertsioa ekarri zion orduan neskak: hamairugarren mendean helikopteroa... Tokio gainetik zebilen.

Askoz ere onargarriagoa.

Boris Vianek ere AEBetan kokatu behar izan zituen bere nobela poliziako eta beltzak. Gainera, Vernon Sullivan ezizenaz argitaratu zituen, Europan kokatuta eta frantses batek idatzita ez zutelako batere sinesgarritasunik izango.

Horrek oroitarazi zidan Edgar Allan Poek, Boston-en jaioa, genero poliziakoa abiarazi zuten "Mary Roget-en misterioa", "Morgue kaleko hilketa" eta "Gutun ebatsia" Europan kokatu zituela, Parisen.

Bestalde, Europan Aita Sainduek tiara izeneko txapelaz estali izan dute burua XIV. mendeaz geroztik, harik eta Pablo VIak, bigarren kontzilioa amaitzear zela, burutik erantzi eta txiroentzako opari gisa eman zuen arte. Juan Pablo biek soiltasun hori ohitura bihurtu dute, erdi lege. Kontua da amerikano batzuek erosi zutela Pablo VIaren tiara. Gaur egun, beraz, tiara bizi bakarra AEBen dago, erakusketa batean, ikuskizun huts bilakatua. Katastrofeak gorabehera, indarra, inperioa eta estilo nagusia AEBra joan dira, Vernon Sullivanekin batera, luzarorako. Atxagaren lagunaren alabak idatzi izan balu New Orleansen gainetik zebilela hamairugarren mendean helikopteroa... gaur tiroka hartu dute erreskate lanetan laguntzera zihoanean, hau desastrea!

Makarrovski
Makarrovski dio:
2005/09/02 15:05

neu be izan nintzen, Zapiain (Markos ez sagardoa) bezala, Atxagaren berbaldietan eta filmari buruzko informazioa irailaren 11ko Zazpikan izango da, gustoa duenarentzat.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Mikel Iturria aka Iturri, irundar bat eibarnauta elastikoarekin agit&prop egiten.

Pedradas, en castellano

Kontrakoa esaten ez den bitartean, blog honen edukia ondorengo Creative Commons lizentzia honen pean dago:

Somerights20

Stat counter