Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Harrikadak / Srebrenica, hamar urte beranduago

Srebrenica, hamar urte beranduago

Mikel Iturria 2005/07/11 07:30

Berria egunkariak gogoratu digu gaur hamar urte beteko direla datorren astean Srebrenicako sarraskia gertatu zenetik. 8000 lagunetik gora akabatu zituzten 1995eko uztailean serbiarrek, II. Mundu Gerraren ondotik Europan izandako sarraskirik handiena. Balkanetan pasa den hamarkadan gertatu zena gogorra izan zen eta Europar Batasunak beste aldera begiratu zuen/genuen.

Gogoan dut Gipuzkoan SOS Balkanes izeneko elkartea sortu zela herrialde haietan gertatzen ari zena ezagutzera eman eta salatzeko asmoz. Sarajevo, Gorazde, Srebrenica... egunero azaltzen ziren komunikabideetan. Juan Goytisolok gogor gaitzetsi zuen serbiarrek, Europak, Estatu Batuek, Nazio Batuen Erakundeak egin zutena. Liburua ere kaleratu zuen, Cuaderno de Sarajevo, oker ez banago. Lagun bati utzi nion eta agur, ez zen etxera itzuli (liburua). Hermann Terstchen jenio bizia ere artikuluetan azaleratzen zen. Eta Arturo Pérez Reverte, telebisio-gizona garai hartan, idazle egun, ateratzen zen telediarioetan berriemaile berezi gisa. Hango kontuak Territorio Comanche liburuan kontatu zituen, TVEtik botatzeko eginiko liburua-edo. Mihi luzeek diote Revertek pagatu egiten zuela kaleetan borrokak muntatu eta horiek filmatzeko. Ia ahaztuta nuen, baina orduantxe hasi zen ezagun egiten José María Mendiluce, geroxeago karrera politikoan saiatu zen gizona.

Bukatu zen guda eta denborak dena sendatzen duela esaten digute, baina hori ez da egia. Oraindik orain 1300 lagunen gorpuak identifikatu dituzte soilik. Badut ezagun bat esaten didana Euskal Herriko arazoa konpontzeko belaunaldiak beharko direla. Eta adibide gisa Espainiako Gerra Zibilan gertatutakoak aipatzen ditu berak. 65-70 urte joan dira eta oraindik ere General Mola kaleak, José Antonio presente eta Avenida Generalísimo dituzu hamaika tokitan. Francoren estatua erditik kentzeko gauez egin beharra dago, fatxak gehiegi aztoratu gabe. Fraga Iribarne jubilatuko ote den ezin esan oraindik, edozer gauza espero daiteke-eta don Manuelengandik.

Balkanetako kontu hauek gutxitan agertzen dira orain medioetan, ez bada Milosevic Hagan epaitzen ari direnaren berri. "Ah! Oh! Egiten duenak jasotzen du ordaina" esanaz bezala agertzen da boterea.

Uztailaren 3an, El Paísek argitara eman zuen Juan Goytisolo eta Hermann Terstchen artikulu bana. SOS Balkanes elkartearen berri ere izan dugu aste honetan: udan Gorazde herrira eraman behar dituzte Gipuzkoako zenbait haur eta gazte.

Esan bezala, Berrian ere hiru orrialde eskaini zaizkio Srebrenicako kontu hauei gaur:

Alesandro Goriren artikulua

Allande Sokarrosen artikulua

Pasako da uztaila, joango dira komunikabideen azaletatik, baina Srebrenican 8000tik gora hildako egon zirena ez da ahaztu behar.

etiketak:
Iturri
Iturri dio:
2005/07/13 00:51

Aupa Leire:

Hona hemen Magdaren blog-ean aurkitu dudan Jasmina Tesanovic-en artikulua.

Lerro bat nabarmenduko dut: "¿Qué ha pasado en el mundo durante estos últimos diez años? El mundo entero se ha convertido en unos Balcanes".

Leire
Leire dio:
2005/07/12 15:08

Ez, denborak ez ditu zauriak ixten. Ixten ditu zauritu ez gaituztenondako. Baina ez dut uste biktimak inoiz ahazteko ez sendatzeko modurik duenik. Zuk aipatu bezala, 1936ko gerrako zauriak ez dira itxi gerra hori bizi izan zutenengan, eta hori gure inguruan egiazta dezakegu edozein momentutan. Orain, Srebrenican gertatutako sarraskia denon ahotan dago, baina bihar beste konturen bat izango da albiste eta horretaz guztiz ahaztuko gara. Ez naiz fidatzen horrelako kontuetaz kausa egiten dutenekin ere... zintzotasun osoz jokatzen duenik egongo da, baina, azken baten, pertsona horiek dagoeneko ez daude han, eta zenbaitzu kausa horretaz onuratu dira, dirutan ez denean irudi publikoan eta faman.

patxi lurra
patxi lurra dio:
2005/07/27 23:22

Bai, horixe. Uztaila badoia, eta beragaz batera Bosniako gudaren batailen urteurrenak eta omenaldiak.

Eta esan behar dot Srebrenicakoek, zentzu batean, zortea deukiela, Bosnia Europan dagoelako. Rwandak, adibidez, orain dala hamar urte baino apur bat gehiago euren guda zibila be eduki eben. Bosnia, Kroazia eta Kosovoko gudek batera eragin zituzten hildakoak baino gehiago sortu zituena. Baina Afrikako herrialdea da.

PD Portzierto, gaia leunduz, orain dala hamar urte Meho Kodro izeneko jokalari bosniarrak Errealean jokatzen eban. Txarto gogoratzen ez banaz, anaia galdu eban guda madarikatu hartan.

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Mikel Iturria aka Iturri, irundar bat eibarnauta elastikoarekin agit&prop egiten.

Pedradas, en castellano

Kontrakoa esaten ez den bitartean, blog honen edukia ondorengo Creative Commons lizentzia honen pean dago:

Somerights20

Stat counter