Irungo AEKko beteranoak
Korrikaren 14. edizioarekin batera, aurkeztu bazuten ere, joan den astera arte ez nuen gertutik ikusi Irungo AEKko beteranoak diskoaren ale bat. Auzoko taberna batean zegoen salgai, Donostian. Azala gustatu zitzaidan eta, gainera, Irungo musikarien ekimena zenez, erostea erabaki nuen.
Julen Lekuona euskaltzale eta musikariaren hitzekin irekitzen da diskoa. Jarraian: Kuraia, Apurtu, Sagarroi, Skunk eta Apoa, Anti-Régimen, Fishotz Ruido, Izaera, Fermin Muguruza eta Xabi Strubell, L´ombre Raya, Oztopoka, Joxe Ripiau, Jeremiah Johnson, Baldin Bada, Minxoriak, Dut, Kortatu eta irakasleak. Gainera, bonus track gisa ageri da Afrikak edizio honetarako eginiko kanta ofiziala, Ni ere bai.
Musikari ezberdinen artean eginikoa denez, bariatua atera da diskoa: soinu gogorrak, festazaleak, lasaiak... Lasaiak? Zahartzen ari naizenez hauek dira nire atentzioa piztu dutenak.
Irunen ezaguna bada ere, Euskal Herrian ez hainbeste, Jeremiah Johnsonek eginiko kantua aipatu nahi dut hemen: Euskalduna naiz eta arraro nago. Negu Gorriak taldeak bere garaian eginiko euskalduntasunaren harrotasun aldarri hari, buelta eman dio kantautoreak.
Euskalduna naiz eta arraro nago
Etxetik ateratzen naizenean
kalean, INEMeko bulegoan
tabernan, diskotekan
eta leku guztietan...
Euskalduna naiz eta arraro nago
Parisen, Madrilen, Pernanbukon eta Donostian
Interneten, egunkarietan,
ETBn ta Euskadi Gaztean...
Euskalduna naiz eta arraro nago
Itsasoan, mendian,
euripean eta eguzkitan,
udaberrian, udazkenean,
udan eta negu gorrian...
Euskalduna naiz eta arraro nago...
Euskalduna ote naiz?
Euskalduna naiz eta arraro nago...
Asteburuan Honddarbin egon naz ezkontza batean, eta berton Korrikaren diskoan parte hartu eban Irungo AEKko irakasle horietako bategaz egon nintzan, Enaragaz konkretuki. Enara da Maiderren koadrilako bat, eta barregarria izan zan Korrika garaian haren argazkia diskoan ikustea. Hain barregarria ez zan honetaz koadrilako zenbat enterau ete zan pentsatzea... Ondoan baina galaxia bi.
Portzierto, ezkontzan Azkoitiko morroi bategaz egon nintzan berbetan, eta gaia atarata saiatu nintzan DVren aurkako mezuak helarazten, betiko topikoak desaktibatzen. Euskaraz irakurtzeko ohiturarik ez? Ohitura hartzeko zer hoberik irakurtzeari ekitea baino. Graziosoa egon zan, erroilo onean beti. "The Daily Basque" irakurtzeko morroi honen aitzakia Erreala zan.
Orbegozo, gogoan zaitugu!