Ingelesen hilerria

Etiam blogosfera aktibora itzuli den honetan, komentario bat. Eztabaida izan dugu azarotik hasi eta abenduan barrena ere Eibartarrak zerrendan, emakumezkoei sarbidea eta bazkidetza debekatzen zaien soziedade tradizional horien inguruan.

Eibar.org elkartean ez dago, Kerizpe soziedadean ez bezala, andrazkoen sarbidea galerazten duen legerik, eta halan-da-be, gure blog komunitatean ez dago emakumezko blogaririk. Elgoibarko neska bat dago, Maite-Etiam. Eibarren ez dago, ostera, andrazko blogaririk. Hori da datu hutsa. Ze esango nuke ETXEKOANDREAK OI bloga ez dela, izatez, femeninoa...

Horixe azpimarratu nuen duela egun batzuk mezu batean eta biharamunean, prezeski, Sustatun artikulua gero eta neska gutxiago apuntatzen dela Informatika ikastera EHUn.

Blogosferan ere, neska euskaldunak urri...

Aspaldiko lagun batekin egin dut topo berriro, Pernan Goñi marrazkilariarekin. Orain enpresa batekin dihardu jo ta sua: Animatu. Bere mezu pribatu bat traizionatuz:

Enpresarioa naiz, hiru sozio gara, SL bat gara, eta bi informatiko fijo dauzkagu. Gure xedea orain da telefono mugikorrentzako jokuak egitea. Bat egin dugu, Kukuxumusuren markaren lizentziapean, eta beste bat egiten ari gara, osorik euskeraz, "Zelda" moduko bat (Zelda da joku klasiko bat, GAme Boy, PC eta segapotoentzako ere badago) baina gure jokuan ez dago ezpatarik, ez inor hiltzerik. Euskarazko lehen jokua izango da mobilentzako.

Animatukoak Bilbon daude fisikoki, eta animatu.com domeinuan sarean. Mezu elektronikoak ere erantzuten dituzte, bestela.

Eibartarrak zerrendan irten zen gaia, nola EITBn talde armeroa eta armeroak esaten dieten SD Eibar taldekoei. Belarriko mina ematen du herrian, bai. Mesedez, armagin deitzeko eskatu dio eibarnauta batek ETBko kirol arduradunari, Pedro Mari Goikoetxeari.

Baina eztabaida luzatu zen armagin berbaren modernotasun eta egokitasunera, eta baita -gin amaierako beste termino batzuetara. Nik blogen kontura aldatu nuen mezuen haria:

  blog-gintza eta blog-gile aipatu izan ditut hortik,   eta ez dakit blog-gin egin beharko ote genukeen...   Eta idazkera ere g+g horretan nola moldatu?  blogintza, bloggintza, blog-gintza? 

Arrapaladan etorri dira beste proposamen batzuk.

• Nik G bakarra erabiliko nuke, errezagoa delako, baina auskalo arauak zer dioen. blogin, blogile, blogintza...
• Beste herri batzuetan -zale atzizkia ere edozer gauzari pegatzen diote. Nire etxean ezagututako esneduna Getarian esnezale esaten da, baina -zale hori edozerri pegatzen diote. Amaginarrebaren jatetxetik txakazalia pasatzen da batzuetan, chatka banatzen duena. Haientzat akaso blogzalea da. Atzizki hau euskara batuan kamioizale terminoarekin lotuta entzuten dugu hedabideetan, eta hau benetan arraroa egiten zaigu Eibarko askori, baina atzizkiaren bizitasunaz ez dut uste dudarik dagoenik.
• Asierrek diosku: Gipuzkoako -zale horren lekua -dun atzizkiak hartzen du Eibarren: esneduna, argiduna, egurduna, arrainduna... Blogdunak be esan leike, orduan. Izatez, esango neuke blogdun egokixagua dala blogin edo blogile baino. Arrateko Ama blogina izan leike, baina Amatiño eta Mendigreen blogdun huts (oraingoz).
• Beste aukera bat ba badago; beste leku batzuetako -le, -taile da Eibarren: emotaile, lotaile, jotaile... Aditzekin lotzen dala dirudi (ez izenekin), baina blogeatzen dabena blogtaillia litzake?
• Amatiñok dio -ari forma zuzen-zuzenean itsatsita ondo legokeela: blogaria, Eibarko euskaraz blogarixa.
• Horren haritik, eta koblakari hor delarik, akaso blogakari?

Blogdun eta blogari horien forma fonetikoekin, aukera gehiago. Berriro, Asier da gidaria: Berba konposatuak edo eratorrixak sortzeko, euskeriak jokera hori daka, bai:

  ardi > art (artalde)  ogi > ok  (okin)  burdi > burt (burtera) edo bul (bulpartika) 

Baina blog moduko berbarik ez dago euskeraz. Hortaz, posible ote hauek:

  blokin? blogin?  blogdun? blotun?  blogari? blokari? blolari? 

Azkenik, lagun batek esandakoa, Eibar baterako jatorrena akaso:

• blogista, -a artikuluarekin esanez gero Eibarren, blogistia

Lan poltsa osatzeko diseinatzaile bila ari gara gure enpresan kolore, forma eta diseinu konbinazioan gustua duena. Interneterako diseinu majoak egiteko jende saiatu eta berria nahi eta behar dugu.

Maite Rementeria gure diseinatzaileak oso gauza politak egiten ditu, adibidez gure azken OAI demoaren azpi-web-a, eta bere logo ederra:

Sinplea baina dotorea, ezta? Ba orain horrelako gehiago nahi dugu, lan gehiago, diseinu gehiago, Maite bezalako pertsona zoragarri gehiago... Internet gustatzea inportantea iruditzen zaigu CodeSyntax-en, ez horrenbeste Interneteko esperientzia akumulatua duzula enpresa honetan edo hartan jardun izanagatik... Hori baino interesgarriagoa iruditzen zaigu zure portafolioa sarean erakusteko webgunetxo bat baldin baduzu, edo blog pertsonal batean zure kezkak argitaratzen badituzu.

Hala ere, Interneteko esperientzia ere ez da guztia, eta baloratuko dugu beste alor batzuetako esperientzia: irudi korporatiboan, arte zuzendaritzan, testu inprimatuaren maketazioan. Komunikazio proiekturen batean ibili izana, alderdi grafikoan, edo mezu-hedapenaren prozesuan gauzak egiten...

Gehien baloratuko duguna:

• CSS estilo orriak ezagutzea
• HTML lengoaia ezagutzea
• Erabilgarritasun (usability) kontzeptua apreziatzea

Ez da ezinbestekoa erraminta horien kontrola, baina, azkenean, geurekin jardungo duenak, horrekin lan egingo du, horretan sinetsiz.

Zuen kurrikuluma edo lan-eskaera, mesedez zuzendu gure webguneko datu-orritik. Ez dugu nahi Word fitxategirik. Testu hutseko azalpenak nahi ditugu, mesedez, eta datu-orri horretan kopi-pega eginda bidaltzea nahi dugu. Mesedez, egindako lanen URL-ak edo portafolioaren Interneteko helbidea eman, halakorik bazenu.

Iragarki honen testurako apur bat inspiratu gara Microsiervos-en Internality enpresarako egin duten eskaintzan, baina harekin konparatuta, askoz ausardia gutxiagorekin...

Joan den astean iragarritako OAI demoa sarean dago jada. Hau duzue helbidea: www.codesyntax.com

Lagin batzuen gaineko liburu edo artikulu bilatzaile bat (disko batzuk tartean). Ez da, izatez, hori baino askoz gehiago, baina hala ere, eskertu beharrekoa da lagina utzi dutenei emandako laguntza. Gainera, demo hutsetik, aplikazio praktiko eta irekietara urratsa erraz eman daitekeelakoan gaude. Euskal Herrian, bereziki, aplikazioa izan dezakeelakoan gaude, eta asteburuan bertan jakin dugu badagoela inguruan beste OAI ekimen bat martxan: Banque Numerique du Savoir Aquitain edo BNSA delakoa, Akitaniako Jakintzaren Gordailu Digitala. Nire lankide Enekok gehiago dakar bere blogean, baina nire iritziz, oraingoz BNSA hori beta bertsioan dago, eta bilaketak oso zuzen ote dabiltzan zalantza dut. Baina bada zerbait, eta poztekoa iruditzen zait.

Hau OAI uzta-biltzaile baten demo txiki bat da. Aukerak erakusteko asmo hutsez egina. Begiratu ezkerreko menuan orri desberdinak:

Laginak utzi dizkigute demo honetarako, honako erakunde hauek:

• Badihardugu euskara elkartea Deba Ibarreko euskal argitalpenen katalogoa.
• Gaztelupeko Hotsak disketxea
• Gerediaga elkartea
• Inguma datubasea (UEU)
• Megadenda.com . Interneteko denda hau Zabaltzen banatzailearen produktua da, eta hark proiektu honetan parte har dezan lagundu dute, halaber, Elkar argitaletxeak eta Plazagunea informatika enpresak.
• Ibinagabeitia proiektua, literatur aldizkarien euskal gordailua, Armiarma.com Susa Literatur argitaldiaren ekimena da, eta ASP software injinerutzaren babes teknikoa dauka.
• Lanbide Ekimena proiektuaren bultzatzaileak: Hetel, Ikaslan, Eusko Jaurlaritza, BBK, Bizkaia eta Gipuzkoako Foru Aldundiak eta Elhuyar.

Eusko Jaurlaritzaren Industria Sailaren Saiotek ekimeneko laguntza ere jaso du proiektuak.

Gauza handia da aita izatea. 6 urteko baten bizipenak gertutik ezagutzea, adibidez. Zein xaloa den euren mundua, eta aldi berean, zein antzekoa: gure imaginarioa osatzen duten mito berberekin bizi dira haiek ere, baina beraientzat, mitoak egiazkoagoak dira.

Publizitatea

Lehengoan joan zen gure Peru lagun baten etxera (Manex). Bi mutikoak sei urtekoak. Telebisiño aurrean zirela, berriketan entzun zituenn Manexen amak, Aitziberrek. Literalki:

MANEX: Viakalek oso ondo garbitzen du, dena oso distiratsua uzten du.

PERU: Bai, egia da, eta gainera ez du karerik uzten.

Zinema

Gauez, lotarakoan, ipuina ezinbestekoa da Perurentzat. Irakurri-ikusiak, Asterixenak adibidez. Neuk ipuin bihurtzen dizkiodan filmen kontakizunak ere gustatzen zaizkio. Birekin, bereziki, exito handia dut: E.T. eta King Kong.

Negar malkoak irteten zaizkio E.T. ustez hilda dagoenean baina espaziountziaren hurbiltasunarekin berriz bihotza pizten zaionean... baita King Kongek etxeorratzaren puntan, tirokatzen dutenean, bere maitea esku ahurrarekin babesten duenean, etxe gainean uzteko neska, hilzorian jausi aurretik.

Patxi Gaztelumendik bloga sortu du gaztelumendi.blogthing.com/ helbidean. Eta Josu Landa berarekin hasi da mezu batzuk idazten. Ongi etorri biei blogosfera euskaldunera.

Blogthing-en bitakorak sortzea erraza da.

http://astiz.blogthing.com/
http://goiatzl.blogthing.com/
http://gorpal.blogthing.com/
http://inhar.blogthing.com/
http://iradelpa.blogthing.com/
http://janigoikolea.blogthing.com/
http://janiremendi.blogthing.com/

http://josunebiku.blogthing.com/
http://korta.blogthing.com/
http://lur.blogthing.com/
http://maddi2.blogthing.com/
http://oihanekorres.blogthing.com/
http://rebeka.blogthing.com/
http://sasiblog.blogthing.com/

Zergatik ez zatitu bitan Gaztelumendi, Josu Landak berea propioa izan dezan? Zergatik ez Armiarman edo Susa-lit-en blog egitura propioa? Bueno, Josuk bere iritzi propioa du eta bertantxe utzi du idatzia.

Euskara ere aldatzen zaigu aukera teknologiko berriekin. Deklinabidearekin zer egin ez dakigu. Ni Berria-ra harpidetua nago, eta goizero ekartzen didate egunkaria etxera. Sustatu-ra ere harpidetzen ahal zara, bai e-postaz edo feed irakurgailu baten bidez (Bloglines-en bidez).

Baina pertsona batera edo batengana harpidetzerik ba ote dago? Deklinatzeko orduan, ez dakit, baina praktikan, bai, eta pertsona batzuengana harpidetzea merezi du. Dudarik gabe, Joxe Aranzabalengana harpidetzea ideia ona da.

Ze, Joxe, harpidegarri dugu osoki.

1. Zer pentsatzen duen, esaten duen eta bizi duen jakiteko, bere bloga dauka, Faroa eta haren feed-era harpidetu zaitezke.
2. Zer ikusten duen, ateratzen dituen argazki xaloak, Flickr-en dauzka eta haren feed-era harpidetu zaitezke.
3. Sarean zer deskubritzen duen, zer ikasten duen, del.icio.us-en kargatzen du eta haren feed-era harpidetu zaitezke.

Hor duzue, Joxe konpletoa: harpidetu zaitezte.

Faroaren lidergoa

Bloga, Faroa, bada pare bat aste martxan duela, eta ez diot ongi etorririk eman neuretik. Berandu bada ere, hemen da, mezu honetan. Lehen mezuetako bat bereziki zorrotza eta egokia iruditu zait, Euskadiko Kutxak iragarki batzuetarako Juanito Oiartzabal kontratatu izana kritikatzen du. Kritikari erreparatuta, antzeko zeozer pentsatu nuen neuk ere iragarkiok ikustean. Mezu horretan lidergo hitza aipatzeak ere atentzioa deitu dit.

Orain dihardut liburu bat irakurtzen lidergo kontzeptuari buruz, Secrets of Leadership: Hitler and Churchill. Andrew Roberts-ena. Gaztelaniazkoarekin nabil eta polita (ideologikoki oso oso Bush-zalea izan arren).

Gutako askorentzat, Joxerena bai lidergoa. Eta Faro honen argia, Interneten nabigatzeko itsas-argi bihurtuko zaigulakoan nago.

Blogger, Blogspot, Google: edukiaren jabe?

Blogspot-Blogger hautatu du Joxek blogerako, Googleren bloggintza zerbitzua. Horren harira, galdera zuzendu diot: Bloggerrekin pozik?

Artikulu sorta handik bat-batean deskargatzerik ba ote dauka? Hau da, han pilatzen joango den ondarea, Joxeren kontrolpean dago ala Googleren eskuetan?

Beste batzuek ere antzeko kezkak dituzte. Microsoft-en Spaces.msn.com blog zerbitzua abiatu delarik, Many 2 Many blog interesgarrian zera irakurri diot Liz Lawleyri: And in general, I’m always nervous about having my blog posts hosted on a central service that I don’t control—I like having my text on a server that I can back up whenever I’d like.

Bai, neu ere uzkur agertzen naiz zerbitzu horiekin. 1998an hasi ginen gu Eibartarrak zerrenda egiten Makelist izeneko zerbitzu batean, gero Yahoogroups bihurtu zena. 2004an, 8.000 mezu, denak Yahooren eskuetan, eta sekulakoak egin behar izan genituen handik berreskuratzeko. Orain gure kontrolpean daude. Hemen kontatzen dut.

Eibarko blogen kasuan, hasieratik, dena kontrolpean: domeinua, softwarea eta edukia.

Mozilla utzi eta Firefox-era igaro naiz. Duela egin batzuk oparitu nion neure buruari, baina gaur ospatuko dut, neure eguna delako. Programa majoa eta polita. Denbora pixka bat hartu dut konfiguratzen, eta programa potolotzen... Nire Firefoxaren menuak honako itxura lodia dauka orain...

Goiko bi lerroak, ohikoak dira:

1. Menua. Firefoxi falta zaio oraindik euskaraz egotea. Ea iristen den.

2. Nabigazioaren barra. Ezkerretan bilaketa aukera bat dauka, baina ez dut uste askotan erabiliko dudanik, ze Google Barra ere instalatu diot, eta horrekin nahikoa.

Eta hortik behera, nire ezarpen pertsonalen kustomizazioaren ondorioak: 3. Faboritoen edo lastermarken barra. Gogokoen artean ohikoenak, hortxe gehitzen ditut, eta karpetaka antolatuta izatea aukera polita da.

Niretzat, bi laster-marka bereziki inportanteak eta ezinbestekoak dira: ez dira berezko loturak, baizik eta eragiketak egiten dituzten tresnak: bookmarklet-ak. Bi ditut irudian agerian, Tinyurl-arena eta Post to del.icio.us . Zerbait ikusi eta URL konplikatu bat erabilgarri bihurtu nahi dudanean, Tinyurl-aren bookmarklet-ean klik egin eta listo. Gordetzeko moduko zerbait ikusten dudanean, benga, del.icio.us-era kargatzen dut beste bookmarklet-arekin. Jamaika ataleko azalpenetan jartzen du Sustatun nola eskuratu bookmarklet hori.

Faboritoen barra honen ezkerraldean beste ikono bat ere ageri zait, beherantz dagoen gezi gorri hori: Slogger estentsioa ezarri dudalako da.

4. Webdeveloper estentsioaren barra da hori. Diseinuan eta garapenean asko laguntzen duen tresna. Hemendik lor daiteke. Mozillarekin ere bazebilen tresna hau, baina Firefox-entzako bertsio esklusiboak aukera gehigarri bat dauka, Edit CSS. Hor klikaturik, ikusten ari zaren orriaren CSS lehen planora agertzen zaizu, eta Wysiwyg eran editatu dezakezu, aldaketak egin diseinuko eraginak aldi berean ikusiz...

Nire blogeko diseinuan, kolorearen letra bat aldatuz, ikusi zein erraz nabaritzen den, fff dioen tokian faf eta aldi berekoa da aldaketa. Irudi hauetan ikusi daiteke:

5. Google Barra hemendik jaitsi dudan estentsioa da. Google-n bilaketak zuzenean aukera ederra da. Berez instalatzen denean, ikono arraroz betea ageri da, eta nire ustez hobeto geratzen da letrekin (ingelesez, kasu honetan). Saguaren eskumako botoia klikatuz barra honen gainean, aukera batzuk konfiguratzeko modua dago... Nik bilaketa batzuk ezkutatu ditut (University etab.) eta beste batzuk agerira ekarri (Google News edo irudietan bilatzekoa).

Google barraren ezkerraldean dagoen Highlight aukera oso majoa da: berba batzuk jarri barran, eta hor klikatuz, testuan non ageri diren fosforitoz azpimarratuta agertzen zaigu. Testu edo orri luzeetan gauzak di-da batean aurkitzeko oso praktikoa da.

6. Fitxak. Fitxen bidezko nabigazioa, aurkikuntza handia; Mozilla edo Firefox erabiltzaile guztiek ziurtatu dezakete hau. Nik lotura baten gainean saguaren erdiko botoian klik eginda zabaltzen ditut fitxak (ez dakit lehenetsitako aukera hori den berez Firefox-en ala aukera hori Mozillan nituen hobespenetatik hartu didan). Mozillan ez bezala, fitxen barrak ez dauka fitxa berria sortzeko ikonorik ezkerretan, bai ordea eskumatan fitxak ixteko X txikia. Hala ere, aurkitu dut nola egin: fitxa huts berriak zabaltzeko, fitxen barraren gainean klik bikoitza egin.

Google Desktop-ek gure disko gogorra arakatzean lan polita egiten du. Baina, zera du okerra, MS produktuetara enfokatua dago osorik. Hala ere, MS produkturik gabe (ez ordea Win XP sistema eragilerik gabe) erabili daiteke, eta neure proba batzuekin neu pozik nago.

Emaitzetan etortzen den gauza bat web history delakoa da, azken aldi honetan bisitatu izan dituzun web orrietako emaitzak, zuzenean katxetik. Baina, hara, hori MS IExplorerrentzat egokitua dator. Baina konpon daiteke, eta Firefox-ekin erabili.

Firefox-eko web historia ager dadin Google Desktop-en, instalatu Slogger Firefox-ekin.

Instalatu eta gero:

• Berrabiarazi Firefox
• Gehitu behar dugu "Slogger Main" botoia toolbar-era: (View -> Toolbars -> Customize..., find buttton and drag to where you want it). Onena, laster-marka faboritoen barrara eramatea.
• Beheranzko gezi beltz bat agertuko da beltzez faboritoen barra. Klikatu eta gorri bihurtuko da.
• Kargatu web orri bat, edozein. Dialogo kutxa bat irekiko da, Slogger preferences eta hor aukeratu behar da zein tokitan gorde orriak, non jarri katxe hori. Folder hori aukeratu behar da. Ez eman oraindik OK ze hurrengo urratsa konfiguratzea ere komeni da.
• Slogger preferences horretako bigarren tab edo fitxan, Save HTML only. Bestela web orrien irudi guztiak ere kargatuko zaizkizu katxe horretan. OK eman.

Une horretatik aurrera, bisitatuko orrien memoria Google Desktop-en azalduko da. Emaitzak web history epigrafean azalduko dira, eta IExplorer ikono batekin ondoan, baina lasai: klikatzean ez da Explorer arrankatzen, Firefoxekin nabigatzen jaraitzen duzu.

Bug txiki bat deskubritu dut. OpenGroupware-ren funtzionamendu normalarekin txoke egiten du Sloggerrek aktibatua dugunean (gezi gorria). Gezi beltza ezarri behar OpenGroupware-n gaudenean. Nonbait, OpenGroupware-ren HTML-an bilaketetan tartekatuta dauden Javascript aginduekin izan behar du erlazioa bug horrek.

Hemengo irudi honetan ikus dezakezu Slogger-en ikonoa, gezia, Firefox-eko nabigazio barran. Kasu horretan, aktibatua dago, gorriz: gainean klikatuz gero, beltz bihurtuko zen eta desaktibatu. Harik eta berriz eman eta aktibatu arte.