Ikasitakoa desikasten ikasten
Kontzertuak
Azken urteetan guztiz utzita daukat, baina hasi behar nuke berriz kontzertuetara joaten. Ea lortzen dudan.
Egun hauetan bi argazki bilduma eder aurkitu ditut, zuen bisita merezi dutenak:
- Aterpeirun-en rock argazkiak . Gehien harritzen nauena da momentu klabe guzti horietan han zegoela tipoa.
- Rafa Espada . Hau itxura batean profesionalagoa, sail jakin batzuetako argazkiak.
eta hauek biak animatuta, zenbait kontzertu toki etiketatu ditut Tagzanian:
venue and guide tagged map - Tagzania
Falta direnak proposatzeko, idatzi hemen edo zuek gehitu Tagzanian, venue eta guide etiketak erabiliz.
Eguneraketa (18:26): Iturrik ere aipatzen du gaia
Telezaborra naiz!
Jario irakurletik irakurtzen duzuenok ez duzue nire mozorroa ikusiko (dela Bloglines, Google reader edo antzerakoetatik), bisitatu beraz nire bloga, mozorroa zein ongi gelditu zaidan ikusi nahi baduzue.
Eta orain harira:
Zenbat buelta izan behar ditugu Mosquera eta Tony horren artean? Norbaiti interesatzen zaio zertan ari diren?
Tony Anipke, mentiroso compulsivo
Bitartean, asko hobetzen ari dena Veronica Sanchez, Los Serranon beti toallarekin gora eta behera zebilena:
Arma industriaren alde interesgarria
Ezin dut burutik kendu armak hiltzeko direla, baina aldi berean oso harro nago - Eibartar partea daukadan aldetik - armagintzaren industriak Eibarren egin duen lanarekin, aitzindari hainbat eremutan eta gerora izan dugun industria guztiari bidea eta jakituria emanez. Horregatik bisitatzen dut hain gustora Museo berria eta beraien webguneko armen datubasea, Jose Valderrey argazkilari finak ateratako detaile argazkiak errepasatuz.
Zorionak IKTeroei
Poz handia hartu dut jakitean IKTeroak izan direla Sareko Argiaren aurtengo irabazleak . Merezi dute benetan, zenbat dedikazio eta ardura, eta zenbat aldiz asmatu duten gauzak ongi egiten. Izan ere beste askok ez dugu lortzen beraiek lortzen duten dibulgazio helburua betetzea.
Sustatun irakurri dudan moduan, jende gutxi harrituko du albisteak
Zorionak eta jarraitu aurrera!
Democracy: telebista demokratikoa
Nik uste dut zer esan asko emango duela Democracy programak. Duela zenbait hilabete saiatu nintzen baina Ubuntun ez zen instalatzeko erraza. Orain bai, oso erraz eta azkarra iruditu zait ( sudo apt-get install democracyplayer eta sudo apt-get install libxine-extracodecs tekleatzea nahikoa izan da martxan jartzeko, nahiz eta oraindik nahiko sarri blokeatzen zaidan. )
Internet bidezko telebista
Democracy edo Democracy TV izena du trastoak, telebista kudeatzeko era demokratikoa eskaintzea bait da bere helburua:
- Zuk nahi dituzun kanaletara harpidetu, nahi dituzun programak ikusteko aukera eginez.
- Zuk kanal propioa sor dezakezu, bai zure bideo eta bai beste batzuenekin.
Nola dabilen
Oinarria RSS jarioak dira. RSS bidez zenbait kanaletara harpidetzeko aukera duzu. Egunero, kanal horiek gainbegiratu eta interesatzen zaizkizun programak aukeratzen dituzu.
Democracy-k aukeratutako programa horiek deskargatzen dizkizu, atzeko planoan. Kasu batzuetan bideoak YouTuben daude, beste batzuetan Google Videon eta beste zenbaitetan BitTorrent P2P sistemaren bidez ere deskargatzen ditu. Democracy arduratzen da hortaz.
Gero, denbora hartzen duzunean edo lasai-lasai sofan eserita zaudenean, lehen aukeratutako bideo guztiak ikusteko momentua da. Pantaila osoan ikusi daitezke bideoak.
Norberaren telebista
Norberaren telebista kanala sortzeko ere erraztasunak ematen ditu Democracyk. Nahi den moduan egin daiteke: norberaren webgunean publikatuz, BitTorrent bidez eta abar. Democracy berak zenbait tresna eskaintzen ditu lan hauek egiteko.
Oraindik sare alternatiboa bakarrik
Oraindik sare alternatiboa da. Nik ez dut telebista kanal jeneralistarik ikusi, baina sarritan hauek interesgarriagoak izaten dira, eta nork daki, agian hasiko dira agertzen. Oraingoz, YouTube bezalakoek lortu dute kontrako bidea egitea, zapping-etan sarritan azaltzen bait dira YouTubeko bideoak, eta azken finean, Democracyn berdin-berdin jar dezakete beraien programak ordaindu ahal izateko publizitatea, ez?
Froga ezazu!
Gehiago pentsatu gabe, Democracy frogatzera gonbidatzen zaituztet, Windows, Mac OSX eta Linux-en erabiltzeko aukera dago eta software librea da! (noski...)
Eguneraketa: Democracyn ikusi dut nik Oscarretarako aukeratu duten Eramos pocos laburmetraia.
Orange: non dago %50eko deskontuaren eskaintza?
Ezaguna da Orange egiten ari den eskaintza : bizitza guztirako %50eko deskontua fakturan Euskalteletik etorritakoentzat. Enpresako telefonoak Orangera pasatzea pentsatzen ari garenez, hara deika ari naiz.
Telefonoz eskaini didate %50 hori. Eibarko Orangeko dendan ere esan didate (nahiz eta beraiek ezin dieten enpresei zerbitzua saldu). Baina nik paperean nahi dut eskaintza hori, beraien aldetik konpromezu bat izateko, eta zehazki ulertzeko zein kasu zehatzetan beteko den konpromezu hori, zein plan kontratatu behar den horretarako, noiz utzi dezaken Orangek bertan behera deskontu hori, eta abar.
Ez dago modurik. Faxez bidaltzen zutela, ez nuela faxik, emateko helbidea, bidaliko zutela, ez dute bidaltzen, berriz deitu dut, lagun batzuen faxa eman dut... eta eskaintza hori ez dator.
Norbaitek lortu du idatziz %50eko eskaintza hori? Nolako tongo itxura duen honek, ez?
Txarrenera ere engainatzen bagaituzte, gaitz erdi, hainbat denboran %50eko deskontuarekin ibiliko bait gara, baina inori ez zaio iruzurra sentitzea gustatzen. Ez dakit zer egin.
Eguneraketa: 18:30. Faxa iritsi da! Azkenean iritsi da faxa. Ni ez naiz abokatua, baina afizio pixka bat badiet kontratu eta klausulei, eta dokumentua oso irekia bada ere (ez da gehiegi zehazten), nahiko esplizitua dela iruditzen zait. Hain irekia da, esijentzia handia egin diezaiokegula. Orange busti da beraz.
Autoa: berria ala bigarren eskukoa?
Ez, ez noa autoa erostera. Kontua da buruan dudan ideia bat konkretatu eta antolatu dudala, eta hori azaldu behar dut.
Nik nahiago bigarren eskukoa
Oraingoz behintzat. Autoak ikaragarri gustatzen zaizkit baina ez nago auto berri baten prezioa ordaintzeko prest. Auto berri bat ordaintzea kapritxoa iruditzen zait, ekonomikoki ez bait dago hori justifikatzen duenik. (Ondo da, onartzen dut, agian bigarren eskukoa ere ez da oso jasangarria baina berriekin inola ere ez.)
Ondorengo grafikoak asmatu ditut nire ideia adierazten dutenak:
Lehenengo grafikak autoaren fidagarritasuna denborarekin alderatuta adierazten du. Auto berria da fidagarriena eta denbora aurrera joan ahala matxurak, izorratutako edo higatutako pieza eta elementuak izango ditugu. Sinplifikatzeko, denbora eta kilometroak batera doazela pentsatuko dugu. Grafika irudikatu dudan moduan, gutxi gora behera zuzen bat izango da, denbora aurrera doan neurrian fidagarritasuna gutxitzen doana. Puntu jakinen batean zuzen horren malda gutxitu eta ia horizontala izango da, izan ere 20 urteko auto bat eta 25ekoa alderatuta, fidagarritasun antzerakoa izango bait da.
Bigarren grafikak autoaren prezioa denborarekin alderatuta adierazten du. Kasu honetan, jakina da auto batek lehenengo bi urteetan galtzen duela balio gehien. Askotan esaten da auto saltokitik atera eta etxera eramateagatik bakarrik autoaren balioa asko jeisten dela. Kasu honetan malda ikaragarria du prezio erorketak. Momentu jakin batetik aurrera, denbora ez da hain garrantzitsua autoaren balio ekonomikoa zehaztean, hau da, ia berdin zaigu autoa 6 edo 7 urtekoa izatea. Zati hori adierazteko zuzen bat jartzea pentsatu dut, prezioa pixkanaka behera joango bait da. Balio galera malda askoz txikiagoa da beraz.
Nire teoria
Nire teoria da, autoa erosten duenak puntu jakin hori aurkitu behar duela, bere dirua modu onenean erabiltzeko. Puntu jakin hori da, balio jeitsieraren malda geldotzen den puntua. Batetik, autoaren fidagarritasuna berriarekin alderatuta ez da askoz gutxiagokoa, eta bestetik prezioaren zati handiena jeitsi da.
Nire autoak
Nik bi auto erosi ditut nire bizitzan. Biak erosi ditut bi urte eta 20.000-40.000 Km ingururekin, eta oraingoz ongi joan zait
Hala ere nork daki. Agian egunen batean aberastuko naiz eta auto berri eder bat erosteko kapritxoa izango dut, eta xahutuko dut diru pixka bat!
Zer iruditzen zaizue? tontakeria eta denbora galera bat da hau dena, ala arrazoi pixka bat badut?
Vocento ere RSSekin
Aizkenen!
Vocentok ere RSS jarioak martxan jarri ditu.
Bi urte izango dira Eibar.ORG-en Diario Vasco eta El Correo-ren Eibarko edizioen jarioak ematen genituenetik, screen scraping apur bat erabiliz. Tristea da baina kasu askotan Internet bidez herriko informazioa jasotzeko aukera bakarrenetakoa izaten da.
Noticias de Gipuzkoaren Debabarreneko edizioaren RSS jarioa Erralek sortu zuen, eta oraingoz hor egongo da martxan. DV eta Correorenak laster desagertuko dira Eibar.ORG-en zerbitzaritik. Aldatu loturak jario berrietara beraz!
Linuxak munduaren dominazioa lortuko du?
Eric Raymonden idatzi interesgarria, 64 bit-etako ordenagailuen eta sistema eragileen gainean. Bere teorian, 2008a da Linuxak duen epea indarra hartu eta 64 bit-etako sistemetan kontuan har gaitzaten. Gauza ez bada ongi ateratzen, garai ilunak aurreikusten ditu:
