Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Anti-gona / Mutilen alkandorapean

Anti-gona

Mutilen alkandorapean

Elena Laka 2012/05/21 22:37

Euskal mutil batek alkandora eranzten duenean, ez dago ezustekorik. Badakigu zer agertuko den azpian:elastiko edo kamiseta bat. Behintzat Sanmigeletatik Sanisidroetara, edo, nahi bada, Kilometroak-etatik Herri Urratsera, gutxi gorabehera.

Mutilek herri honetan kamiseta janzten dutelako alkandoraren azpian. Alegia, alkandora hutsean doazela ematen duenean, ez dela huts-hutsa, alkandora elastikoarekin baizik. Esango nuke janzteko modu hori uda goienean hasten dela, irailaren bukaera aldera, eta berriro udako beroak hasi arte irauten duela, maiatza erdi edo bukaerararte.

Diogu gainera kamisetarekin topo egitea eranzteko prozesu horretan ez dela ezustekoa, zeren "elastikoa daramat eta harro nago" lelopea bailitzan, kamiseta agertu egiten da alkandoraren paper irekitik, ikusi egiten da. Horrek esan nahi du:

  • kamiseta ez dela tiranteduna, maukaduna baino.
  • alkandoraren hiru botoi gutxienez lotzeke, elastikoa agerian uzteko.

 

Eta ondorioa da kamiseta urrutitik ikusi egiten dela.

Izan daiteke zuri klasikoa, Gorka Bereziartua kazetariarena bezalakoa, nabarmena bere Twitterreko profilean:

Gorka Bereziartua

 

 Zuri kolorekoa baita ere Pako Aristi idazlearena, bista-bistakoa argazki honetan:

Pako Aristi

Sarritan kamiseta beltza da, alkandoraren kolorea edozein izaki ere, Kirmen Uribe idazleak erakusten duenaren modukoa:

Kirmen Uribe

Beltza alkandora morearen azpian, Andoni Egaña bertsolariari ikusten diogunaren parekoa:

Andoni Egaña

Beltza alkandora koadrodunen azpian, Ramon Saizarbitoria idazleak konbinatzen duen eran:

Saizarbitoria

Moda joeran ausart, kolore indartsuei ere ez diete muzin egiten, Goienako Iban Arantzabal adibide:

Iban Arantzabal

Begiratu inguruan, eta konturatuko zarete mutilen alkandorapeko kamiseta bista joera ikaragarri hedatua dagoela, bizitza sozialaren edozein ekitalditan topa dezakegula.

Esate baterako Espainiako Kongresuaren ohiko jardunera iristea lortu du Iñaki Antiguedaden paparretik:

Iñaki Antiguedad

Eta baita ere eztei ospakizunetara, Luistxo Fernandezen papar irekia erakusgarri:

Luistxo

Alkandorapeko elastikoaren bistaratzearen zergaitia ulertzera ez naiz ondo iristen, hau da, misterio bat dela niretzako. Erosotasuna, praktikotasuna, katarroaren bildurra, estetika, inertzia...

Zergaitik janzten eta erakusten ote dute mutilek elastikoa alkandoraren azpitik?

 

leire narbaiza
leire narbaiza dio:
2012/05/22 17:28

Oso post ona, Elena! Barre asko egin ditut! Aitortu behar dut morbo puntu bat ere ematen diadala kamisetarenak. Baina nerabezaroko oroitzapena izan daiteke, orduan jarri baitzen modan, mahoizko praken antzera (hori ere etorriko da) Baina batzuetan errebindikatzeko balio dute barruko kamiseta horiek, Telemadrid-en adibidez, Sanchez-Dragoren saioan http://youtu.be/u2W9qkPt9nQ?t=1m17s Ezkutuan gorde inork erantzarazi ez diezaion!

Aritz
Aritz dio:
2012/05/22 14:53

Behin ezkontza baten frantziatik gonbidatuta etorritako neska gazte batek, barruak ondo busti ondoren, harizko alkandoraren azpitik kamiseta zeraman lagun bati hura estetikoki ez zela "glamourosoa" esan zion, herrezkero, ni neu frantsestuta nabil...nirea bai pertsonalidaderik eza!

Elena
Elena dio:
2012/05/22 02:10

Hasier, Googlen irudi bilatzaileak fede ematen du ez duzula paparretik elastikoa erakusten. Zure moduan, bilatu genituen kamisetadun beste hautagai posible batzuk, baina botoia itxita, edo biloak bistan zituzten. Garbiketa eta lisatzearena, bururatu ez zitzaidan argumendu pisutsua da.

Elena
Elena dio:
2012/05/22 00:56

Zalantza barik, argudio borobila. Ez dakit ordea guztien kasua berdina ote den. ebur

H. Etxeberria
H. Etxeberria dio:
2012/05/22 01:53

Aurten birritan saiatu naiz azpiko kamisetia kentzen, ez baijata eroatea komeni (gizendu egiten nauela uste dot), baina atzera egin dot bixetan, hain juxtu hotzagatik. Nik kamisetia kendu eta eurixa eta Iparra berriro hastia, dana izan da bat. Hiru botoien kontu hori, ostera, ez dot praktikatzen eta, ahal dala, ezkutuan eruaten dot. Nire kasuan argi: hotzagatik. Baina badago beste gauza bat ere: kamisetia darabilzunian azpitik, alkondaria behin baino gehiagotan erabil daiteke, nahikoa da kamisetia aldatzearekin harek hartzen baitu izerdia eta ez alkondariak. Horrek lan asko aurreratzen dau, nire antzera, lixatze kontuetan alferra danarentzat. Beste misteriorik ez diot ikusten nik, nahiz eta Saizarbitoriak ere badarabil, izango direla argumentu eskisitoagoak ere.

oier g
oier g dio:
2012/05/22 00:50

"Zergaitik janzten eta erakusten ote dute mutilek elastikoa alkandoraren azpitik?" Nik neuk, pektoral gixartsuen kanalillua ez erakusteko; ez dot nahi kuleruak ezker-eskuma bustiarazten ibiltzia-ta...

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

"Jantzi. Erantzi. Janzkiak, arropak, soin gainekoak. Moda, estiloa, bizitzaren zati bat. Umorez, eztenaz, xarmaz. Leire eta Elenari interesatzen zaigu. Baita zuri  ere, ala ez?"

@ElenaLaka

@txargain

Izan eta esan

Kalamuatik Txargainera