Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Kalamuatik Txargainera / Mercadonaren lilura

Mercadonaren lilura

Leire Narbaiza 2016/09/10 15:20
Gipuzkoako Hitzan 2016ko irailaren 9an argitaratuta

Pasa den astean Mercadona supermerkatua zabaldu zuten Eibarren. Denda handia, aparkaleku pila batekin. Ez dakit zer esango duten gure herrian denda txikiak dauzkaten dendariek, baina ez dut uste oso pozik egongo direnik; izan ere, supermerkatu berri horretatik oso hurrean beste handi bi ere badaude: Eroski eta El Corte Ingles. Hori 300 bat metroan. Ahaztu barik, Lidl, Dia eta BM ere badaudela hiriaren beste gune batzuetan. Ez dakit zelan lortuko duten guztiek bizirautea.


Tira, hain gune handiak zabaltzeak ez nau askorik harritzen. Badirudi hori dela azken boladan “modan” dagoena: supermerkatu/hipermerkatu asko leku txikian. Mercadona fenomenoak nauka miretsita, bere izen hutsa aipatzeak sortzen dituen kondaira eta lilura. Horrek lagatzen nau aho bete hortz.


Kontua da, aspalditik zebilela eskualdean denda zabalduko zutelako zurrumurrua. Prentsan ere agertu zen. Halako albisteak bolo-bolo barreiatutakoan, jendeak “Ze ondo!” esaten zuen. Ni horrekin txokatuta geratu izan naiz. Ez baitut konprenitzen denda horrek sortzen dien xarma. Zergatia eskatu eta arrazoibidea beti izan da bera: kremak.


Erantzunak begiak talo eginda utzi izan nau. Sakontzen hasi, eta inoiz ez dira gai izan esateko zer gehiagok erakartzen zituen. Beste batek esan zidan zeliakoendako produktu asko zituztela. Ea zeliakoa zen bera edo bera familiako norbait, nik itaundu. Eta ezetz, baina entzuna zuela jabearen alaba gaixotasun hori zuela eta horregatik gluten gabeko produktuen eskaintzarena.


Ikasle talde baten gertatu zitzaidan hau. Ezin ulertuta nenbilen, baina ikasleek, azkenerako ere ez zekiten zergatik zuten hain gustuko Mercadona. Nik ere segitzen nuen haluzinatuta.


Baina kaleko jendeari zer zirrara sor liezaiokeen deigarria zaidan arren, Mercadonaren beste kontu miragarri batzuek ere ematen didate atentzioa. Esate baterako, publizitaterik egiten ez dutela. Tira, ez dakit zer ulertuko duen publizitate berba esanda marka horrek; izan ere, errepideetan dauden panel handi horiek kontratatu dituzte. Eta herriko jubiletxeetako baten hainbat hitzaldi eman. Bertara joandakoak produktuz betetako poltsekin irteten ei ziren berbaldiotatik. Enpresak panel eta hitzaldi “informatibo” deitzen die ekintza hauei. Neohizkuntza darabilte elikagaien banaketako taldekoek ere, antza.


2016-08-17_12-10-04

Niri, ostera, harrigarriena prentsa idatziarena egin zait. Hiru egunkaritan titular bera agertu da denda berria dela eta: Mercadonak supermerkatu berria zabalduko du Eibarren 40 lanpostu «egonkorrekin» (Mercadona abre un supermercado en Eibar con 40 empleos «estables» 1, 2, 3). Berbaz berba berdinak. Harritzekoa, ezta? Agentziak banatutako prentsa oharra kopiatuta hiruretan. Hori bai, notizia baino publi-erreportajea da. Ordutegiaren berri ematen du, zein inbertsio egin duten, zein zerbitzu eskainiko dituzten,... Ez dute iragarkirik jartzen, baina publizitatea era ezkutuan, barra-barra darabilte. Prestigioagatik ote? Nork kobratuko du propaganda ezkutu hau? Nola?


Baina ez esan tristea ez denik denda baten gaineko mistika hau. Ez dakit zer bihurtzen gaituen, kontsumoaren akolitoak, produktu batzuengatik proselitismoa egiteko kapazak. Jabe aberatsen mesederako, gure miseriarako. Miseria morala, besterik ez bada ere. Erostea delako gure erlijio berria.

Hemen Gipuzkoako Hitza-n

Save

Txabi
Txabi dio:
2016/09/13 12:16
Bizkaian antzeko parezido gertatu zen eta ni ere koplarekin geratu nintzen (barkatu erderakada),hau da, neurriz kanpoko tratamendua.
Zuk "prentsa" aipatzen duzu, baina izen abizenak dituen talde bateko prentsa izan da kanpaina egin duena, VOCENTO taldea. "El Correo" Bizkaian eta "El Diario vasco" Gipuzkoan.
Ze nolako lotura duten VOCENTOk eta Mercadonak ez dakit. Hau da ikerketa egiten duten kazetariek egin zezaketen lan bat.
Eta muinari helduz, egiaztatuta geratu da ze nolako eragina duen gugan publizitateak, batez ere mozorrotuta sartzen digutenean.
Leire Narbaiza
Leire Narbaiza dio:
2016/09/13 13:05
Aupa, Txabi! Mila esker erantzuna lagatzeagatik, ilusio handia egiten du!

Ados, Vocento izaten da kanpainburu. Baina Oraingoan Noticias de Gipuzkoa eta El diario.es ere izan dira. Berbaz berba agentziako berria kopiatuta!
Iur naiz ikerketa interesgarria dagoela horren atzean!
aitor
aitor dio:
2016/09/14 13:18
Neurri batean orain arte behintzat bertan ez egoteak sortu du mistika hori, hurbilean eskuragarri ez daukagunak sortzen baitigu lilura. Askorentzat, Euskal Herria, Mercadonarentzat lurralde komantxe bat zen. "Bazen garaia hona etorri eta Eroski-ri konpetentzia egiteko ordua" diote askok, Eroskik monopolio bat baleuka bezala eta euskaldunok monopolio horren biktima bagina bezala. (!?).
Joxe
Joxe dio:
2016/09/14 13:41
Epa Leire! Hau diozu: "Agentziak banatutako prentsa oharra kopiatuta hiruretan. Hori bai, notizia baino publi-erreportajea da. Ordutegiaren berri ematen du, zein inbertsio egin duten, zein zerbitzu eskainiko dituzten,... Ez dute iragarkirik jartzen, baina publizitatea era ezkutuan, barra-barra darabilte. Prestigioagatik ote? Nork kobratuko du propaganda ezkutu hau? Nola?"

Bueno, jakin dezazun: 'ezkututik' gutxi du era horrek. Publizitate agentziek gero eta gehiago eskatzen dute horrelako publizitatea, honezkero betiko publi moldeek (moduluak, orri erdiak, orri osoak) oso eragin txikia dutelako. Are gehiago: medioen publizitate eskaintzaren barruan joaten da, moduluak-eta baino askoz ere garestiago noski.Faldoi bat hainbat euro, bi osoko erreportajea 'publi-erreportajea' aipamenarekin beste hainbat, eta aipamen hori gabe, beste hainbat. Agentziak eskatzen du, faktura bidaltzen zaio, eta listo. Ezkututik gutxi.

Ohiko praktika da, eta ez Vocenton soilik. Eta ez Mercadonak soilik. Eroskik ere egiten du, eta Kaikuk, eta...

Eta bai: kazetaritza ikuspegitik terriblea da. Baina hortik datozen diru sarrerei uko eginez gero, denon artean pentsatu beharko dugu kalitatezko informazioaren truke zenbat ordaintzeko prest gauden...
leire
leire dio:
2016/09/15 13:15
Milesker Aitor eta Joxe erantzuna lagatzeagatik, ez dakizue zelako ilusioa sortzen didan!

gia da askoko horrela ikusten dutela Mercadonarena. Supermerkatu ugari dugu EHn, eta herri handietan larregi, nire gusturako. Halere, bakoitzak bere politika darama tea bere bezeroak dauzka. Ikusiko dugu ezer aldatzen den Mercadona etorrita.

Joxe, hala da, badakit. Baina egunkaria edo aldizkaria erosten duenari iruzur egitea dela uste dut. Medio handietako enpresek halako jarduerekin kazetaritza desprestigiatzea baino ez dute lortzen. Epe laburrerako etekin ekonomikoek epe luzerakoak desegin dituzte. Pena handia ematen dit!
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hiru ken lau (idatzi zenbakiz) ?
Erantzuna:
Aurkezpena

Leire Narbaiza Arizmendi

Irakaslea eta blogaria (+)

Madalenak Kafesnetan

Madalenak Kafesnetan

Madalenak Kafesnetan atala
#MadalenakKafesnetan

Artxiboa
2024 2023 2022 2021 2020 2019 2018 2017 2016 2015 2014 2013 2012 2011 2010 2009 2008 2007 2006 2005
Kontagailua