Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Kalamuatik Txargainera / Gauekoa

Gauekoa

Leire Narbaiza 2012/08/12 10:31
Berria egunkarian abuztuko kolaborazioa "Gerizpean" atalean. 2012/08/12

Gauekoak, tradizionalki, espiritu gaiztoak izan dira Euskal Herrian. «Gaua gauekoentzat, eta eguna egunekoentzat», zioten gure aurrekoek. Gaua arrisku guztien ama baitzen, deabru eta sorginen bizilekua (edo bizi-denbora?), saihestu beharrekoa, kateak ekartzen ez zituelako.

Gautarra naiz, oso. Gauez bizitzea atsegin dut. Oso nekatuta egon arren, askotan, berpiztu egiten naiz hamarretatik aurrera. Barruan sortzen zaidan zerbait da. Gainera, lotara joatea ere kosta egiten zait, nahiz eta oso lotia naizen, eta ohean egotea ikaragarri gustatzen zaidan, batez ere neguan, hartzak hibernazioan bezala.

Onetti idazle uruguaitarra zela uste dut, bere azken urteetan ohetik ez altxatzea erabaki zuena. Ohean bizi zen, nahi zuelako. Hainbesterako agian ez, baina eguneko ordu batzuk… kezkarik ez banu, atsegina litzateke.

Gustuko dut gauez jardutea, baina ez parrandan ibiltzeko soilik, atsegina sortzen didaten gauzak egiteko baizik: pelikulak ikusi, irakurri, Interneten ibili, galdu zaidan hura topatu…

Zein ederra litzatekeen, gainera, egunero hamarretan edo hamaiketan jaikitzea, hiruretan-edo oheratuta! Plazera!… Nire biorritmoetarako egokiena litzateke, baina ezin munduaren kontra egin.

Horregatik esaten dut gautxoria izateak badauzkala zenbait kontu kaltegarri ere. Berandu lotaratuz gero, berandu altxatu, ezinean, gainera. Derrigorrean goiz jaiki behar; izan ere, mundua goiztiarrendako dago antolatuta, zoritxarrez! Eta izaera hau daukagunok ez dugu antolaketa honekin gozatzen; batez ere, kabaretera ordutegiak izanda (lanean berandura arte ibilita). Gure joera bada belu oheratzea, lana gauez amaituta, atzeratu egiten zaigu, eta hurrengo egunean ostera ere, goiztiarrek markatutako pausoa segitu behar dugu! Latza!

Konturatuta zeundeten goiz zaleen diktadura honekin? Gehiegikeria hutsa dela deritzozue diktadura deitzeari? Bai? Orduan, zergatik dago ondo ikusita seietan jaikitzea eta ez hamarretan? Zer dela-eta esaera zahar hauek: «Goiztiarrari Jainkoak laguntzen dotso?». Froga garbia dela esango nuke nik! Inork ez du galdetzen ea zein ordutan oheratu den berantiarra, eta zergatik dituen ordutegi horiek. Alfertzat hartu, eta kito!

Gizartearen arauak arau, niretako berandura arte ez oheratzea plazera da; hori ez ezik, joera naturala ere bada nigan, azaldu dudan moduan. Eta gaupasa egitea! Zenbat gustatzen zaidan, eta zein erraz egiten den eguna! Noizean behin, asko estimatzen dut irakurtzen hasi eta gustura egon eta hurrengo goizean betebeharrik ez badut, goizaldera arte edo liburua amaitu arte jo eta sua leitzen ibiltzea! Gozatua, udan eta oporretan baino ezin dudana egin!

Beraz, goiztiarrok, konpreni gaitzazue, beste ordutegi batzuk ere badira-eta!

Mikel Larreategi
Mikel Larreategi dio:
2012/08/12 11:10
Diktadore bat besterik ez naiz...
Leire Narbaiza
Leire Narbaiza dio:
2012/08/12 11:16
Ze, goizale hórretako bat zara? Sufridu eragitzen destana? Ai, ai, ai!!!
Ricardo Gómez
Ricardo Gómez dio:
2012/08/12 15:45
Nik, aldiz, zure biorritmo berdinak ditut, nahiz eta zoritxarrez ezin ditudan beti aske utzi. Lankide gehienak harritzen dira esaten diedanean nahiago dudala eskola arratsaldez eman goizean goiz baino; izan ere, goizeko 9etan ez naiz inor.

Et Onetti ohezalea aipatu duzula, gogora etorri zait Hugo Schuchardt hizkuntzalari eta euskalari ospetsuak eskola ematen zuela bere etxean, ohean sartuta. Aspaldi, pasadizoa ezagutu nuenean, grazia egin zidan, eta ideia ona ere bai! Baina duela gutxi esplikatu zidaten zergatia, eta grazia galdu zuen: eskola ohean emanez gero, Schuchardtek saihesten zuen ikasleen artean emakumerik izatea, desegokitzat hartzen baitzen, noski, emakume bat irakasle pijamadunaren aurrean egotea.
leire
leire dio:
2012/08/12 23:44
Mila esker, Ricardo!
EZ dakit zergatik ez zuen Hugo Schuchardtek ikasle emakumeak izan nahi, orokorrean finago eta langileagoak batira… misoginoa galanta!
Ohearen egotea ikaragarri gustatzen bazait ere, niri klasean mugitzea gustatzen zait, antzerki pixka bat egitea, eta ohean gaizki! Arbelik ez zuen erabiliko, ezta? Zenbat pertsonaia, guri takatzea ere :-)
Niri esnatzea eta espabilatzea kostatzen zait gehien. Getxo ikasturte baten goizeko 8etan neukan klasea, eta Eibartik Romoraino joateko goizeko 6etan jaiki behar izaten nintzen. Jakina, 8etarako bizi-bizi egoten nintzen, nire kide askok, bertan bizi zirenak, galdetzen zidaten ea nola zitekeen. 40 minutu zeramaten esna, ni ordu bi. Horra hor gakoa!
Ondo segi!
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Idatzi zortzi zenbakiak erabiliz
Erantzuna:
Aurkezpena

Leire Narbaiza Arizmendi

Irakaslea eta blogaria (+)

Madalenak Kafesnetan

Madalenak Kafesnetan

Madalenak Kafesnetan atala
#MadalenakKafesnetan

Artxiboa
2019 2018 2017 2016 2015 2014 2013 2012 2011 2010 2009 2008 2007 2006 2005
Kontagailua