Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Kalamuatik Txargainera / 40

40

Leire Narbaiza 2008/04/05 00:52
Serratek disko bat dauka “Hace 20 años que tengo 20 años”. Nik ere gaur duela hogei urte, hogei urte bete nituen.

Berrogei urte! Pasada bat da! Kartzela zigor maximoa Espainian! Berrogei ziren Ali Babaren lapurrak, berrogei egun irauten dute kuarentenak eta garizumak. Berrogei urtez ibili zien juduak basamortuan.Duela berrogei urte sortu zen euskara batua. Pragan Udaberria izan zuten, baina Parisen ez zuten adokinen azpian hondartzarik aurkitu

Aurten, berrogei betetzen dugunok asko gara, baby-boom-ekoak garelako. Ez dut oso jende garrantzitsua aurkitu (nire lagunez eta nitaz aparte, jakina!): Céline Dion, Chayanne, Sabrina (boys-boys), Felipe Borbon, Aitana Sanchez Gijon, alejandro Sanz, Carla Bruni…. Urte honetatik aurrera ez dugu gehiago esango hogeita piku urte daukagula…..
Niri gogorra egingo zait hamarkada aldaketa. Depre txikitxo bat daukat, berrogeien krisia. Pentsatzen dudan bakoitzean…

Ez da txarto nagoelako, beharbada hau da nire bizitzako momenturik onena: pertsona orekatuagoa naiz, eta hau asko esatea da oso desorekatua naizelako; nahiko pozik bizi naiz, gauzak hobetu ditzakedan arren; gustuko lana daukat, leku egokian.

Baina edozeinek balantze moduko bat egingo du hona iristean. Amestu eta pentsatutako asmoak bete diren. Heldutasuna zer den edo existitzen ote den, bizitza erdi eman dugu eta. Gainera, andreondako etapa berri baterako atea da: menopausia, mamuz beteriko zonaldea. Ama ez bagara izan, jakin dakigu ia ezinezkoa egingo zaigula ugaltzea behin hona ailegatuta.

Zimurrak ez zaizkit inporta, espero dudalako amama Maria Angelesen kutis kalitatearen laurdena izatea —herentziaren bat izatea ere ez legoke gaizki—, eta buruko zimurrek ardura didatelako. Aspaldi esan zidaten lehenengoz: “Señora, ¿me dice la hora, por favor?”. Ile zuriendako ere aspaldi asmatuta dago zer egin. Ez, zahartze horrek ez dit inporta, gazte asko baino gazteagoa naizelako espirituz. Hogei urte neuzkanean baino gazteagoa naizela esango nuke, gainera! (batek baino gehiago infantila ere banaizela esango du).

Berrogei, nahi barik, konturatu orduko. Uf! Baina gaur nire eguna da, eta ospatu beharra dago, ezta? Ba, hori. Ospatzeko mordoa daukagu! Txin-txin!!


Aitziber Iriarte
Aitziber Iriarte dio:
2008/04/07 14:30

Kaixo! Berandu bada be, ZORIONAK NESKATXA! Ondo esan dozu, inporta dabena izpiritua da eta gu beti gazte! Ia bazkari bat antolatzen doun soziedadian.....Patxo handi bat.

Gari
Gari dio:
2008/04/05 10:07

Zorionak Leire! tangoak ez dau esaten "que cuarenta años no es nada" ? ;-)

Beti ridikuloak iruditu zaizkit urteak betetzeko beldurrez dabiltzanak, eta inguruan baditut batzuk. Estaziño kaleko pintore bizardunak esaten dau: No me quito ni un año! con lo que me ha costado cogerlos!

Marije
Marije dio:
2008/04/06 15:27
  1. nik ere aurten. 40ak izugarri onak izan ziren. 41ak aldiz gogorragoak. Beharbada adinaren pisuagatik baino inguruko gorabeherengatik. 42ak hobeak dira dagoeneko. Eta 50ak iristen direnean auuuppp, gustura kontatuko dugu hamarkada honen amaieraren balantzea ere. Besarkada goxo bat Leire.
iturri
iturri dio:
2008/04/05 15:25

Kaixo Leire:

Lehenik eta behin, zorionak.

Bigarrenik, ni ere aurten klub horretan sartuko naizela. Uztailaren hasieran.

Hirugarrenik, galdera: zer ikusten "altura" horretatik?

Ondo pasa.

Ah! Jabier Muguruzak musikatu zuen Atxagaren "Iritziak euriaz" etorri zait gogora:

"Ehun urterako / hirurogei edo / falta zaizkidan / une honetan / euria ez da jada / euria bakarrik / baizik eguraldi / txarraren mutur / edo alderdi bat; kritika zorrotz bat / bidaliko nuke / laino goibeletara / baina euriak, ai / ez dit entzun nahi".

Jozulin
Jozulin dio:
2008/04/07 16:59

Estoooo, zorionak!

Elena
Elena dio:
2008/04/05 22:43

Leire, zorionak guapisima! Neri 42 jausi jatazen, eta? Ondo! Ondio ikasteko daukagunarekin...:) Ondo ospatu eta musu handi bat.

Julen
Julen dio:
2008/04/05 08:01

Oraindik ere esan dezakezu hogeita piku urte dituzula: ber hogei, hain zuzen ere. Zorionak Leire, eta jarraitu hain maja.

Josu
Josu dio:
2008/04/05 20:01

Animo, 40 ez da hainbesterako. Nik gaur 21, orain biok dauzkagu (ber)"hogeitapiko". :)

Patxi Iraeta Zubeldia
Patxi Iraeta Zubeldia dio:
2008/04/07 01:43

Zorionak Leire! 50 urte dituzunean esango dezu, ai, 40 banitu! Ba hori da ba, oraintxe 40! Aprobetxatu ;-)

Bertoko
Bertoko dio:
2008/04/17 14:53

Hamabi egun beranduago izan arren, nik hori gaurko egunez orain dala urte batzuk, hiru? igarotakoa naz. Lagun batek, neska batek, esandoste krisia izatekotan gizoznekoetan dala, ez andrazkoetan. baina nire kasuan ezeztatu egiten dot, lagun horrek esandakoa, Beraz, Leire carpe diem.

e-gor
e-gor dio:
2008/04/06 23:55

Amerikanuen topikuan arabera, berrogeixen krisisa deportibo bat erositta edo idazkarixakin liauta pasetan da, asike badakitzu!

Zeuk esan dozu, espiritukua da inporta dan adina, eta horretan ziur egon, ezauketan zaittudanetik ez zarela zahartu. Zorionak eta segi holan!

Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Leire Narbaiza Arizmendi

Irakaslea eta blogaria (+)

Madalenak Kafesnetan

Madalenak Kafesnetan

Madalenak Kafesnetan atala
#MadalenakKafesnetan

Artxiboa
2019 2018 2017 2016 2015 2014 2013 2012 2011 2010 2009 2008 2007 2006 2005
Kontagailua